الحب في رواية تونسية قصيرة . ( العجوز يثرثر )

كان حبيتك من فوق ، تقللي :

أشنوه هالتكبر ، تواضع شوية وتعالالي  .. 

كان حبيتك من تالي ، تقللي :

 أشنوه ماعجبتكش كشختي ، مللى رويق هذا .. 

كان حبيتك من قدام ، تقللي :

 شبيك رامي عينيك عليا ، من هوني ، ومن غادي ، عندك حاحة مخبيها في شوني .

كان حبيتك ماللوطة ، تقللي :

هز راسك لفوق ، خليك بكرامتك ، اللي يحب ما يهبطش راسو .. 

كان حبيتك عالجنب اليمين ، تقللي :

 ما يحوكش أن شاء الله ، شبيك تخزرلي مسارقة .. 

كان حبيتك عالجنب اليسار ، تقللي :

 ماو لا بأس ، عجبتك الخوصة اللي في وذني ، تهنى راهي فالصو ، مذرحة ..  

كان حبيتك ومشيت ، تقللي :

 إيجا لهوني ، ياخي اللي يحب يخاف ، ويمشي فيسع ، كاينو هارب ، رانا ما ناكلوكش .. 

كان حبيتك وجيت ، تقللي  :

 وه ، عالحس تقسم الباي ، أشبيك مزروب ، الصوف يتباع بالرزانة.

كان حبيتك وتحيرت ، تقللي :

آشنوه اللي  يحيرك ، ياخي فما حاجة ريتها مني .. 

كان حبيتك وتهنيت ، تقللي :

ياوعدي ياوعدي ، الناس ترقد وانا نبات ساهرة وحدي .. 

كان حبيتك وفرحت ، تقللي :

 ياخي هبلت ، آش توتى عليك .

كان حبيتك وحزنت ، تقللي :

 شكون قاللك حبني ، وانا راني ماقتلكش نحبك .. 

كان حبيتك عالأخضر ، تقللي :

 شبيه لحمر دوني .. 

كان حبيتك ع الأحمر  تقللي :

 من أولك ناوي عالخنن ، ونيتك ميش صافيه .

كان حبيتك عالألوان الكل ، تقللي  :

 شوف ، أنا الترهدين ما نحبوش ، ياتحبني عالأبيض ، ياتحبني عالأكحل ، اللون اللي هكا وهكا ، راني تطيرلي منو ، ما نهضموش .. 

كان حبيتك ومديتلك وردة حمرا ، تقللي :

شنوه زعمه زعمه رومانسي .. 

كان حبيتك وقلتلك  :

ما احلاك وما احلى زينك وعينيك ، وما احلى شفايفك ، وما احلى فارتك وتهنكيرتك ومشيتك ، وما أبن ريحة البارفان اللي عاملتو ، تقللي :

 أسمع ، أدخل طول في الموضوع ، ويزي مالمقدمات .. وهاني من تو نقلك ، التحرش راني ما نحبوش ..

وكي نقللك :

من فضلك لازمك تفرق بين التغزل واتحرش ..

تقللي :

عيشك يزيني مالفلسفة والتدوهين ، كي تقللي ما أحلى فاراتك وما احلى شفايفك ، اش معناها تره .. وكي تزيد عليهم المشية والتهنكيرة ، اش قعد تره .. 

كان حبيتك ودخلت في الموضوع من غير مقدمات  تقللي :

 صار أنت هذا علاش ناوي ، أنا راني مانيش متاع هذا ، أعرف في أشكون قاعد تكلم .. 

وكان حبيتك وعملت مقدمات ، فيها كليمات من هنا ومن غادي  تقللي :

وووووه ، ياخي هكا ، طول لا طاح لا دزوه ، ماو نتعرفو على بعضنا قبل ، وندرسو طبايع بعضنا . 

كان حبيتك وفي يدي جريدة ، تقللي :

 خيت عليك هو انت من جماعة الثقافة ، وووه عليا ووووه ، صار أنت مالجماعة اللي يقراو في الجرايد ، ما تقللي تحب تقرأ الكتب زاده .. 

كان قلتلك :

ايه ، نقرأ الكتب ، وعيب عليك ، قداش فكرتك خايبة عالمتثقفين ، المتثقفين راهم نوارات البلدان ، وفنارات الشعوب ، ما تقولش عليهم هكا ، تقللي :

ما امسطهم هاللي يقولوا عليهم متثقفين ، ما نطيقش نتفرج عليهم في التلفزة ، فيسع نمشي نلوج فيلم ..

وكي نقللك  :

هو انت تشوف متاع التلفزيون ، وتقيس عليهم في المثقفين  تقللي :

علاه ، ياخي عندكم ما خير ،

وكي نقللك :

ايه ايه عنا برشه ، شعراء ، وناس تكتب الأدب و القصص ، وناس تبحث وتبربش وتفكر ، تقللي  :

عيشك يزيني من هالرويق البارد ، عفت الأدب راني مللي انا في الباكالوريا ، خللي عاد ، كي نقراو على هاك السد المحنون متاع المسعدي ، اللطف وبره ، راني عام كامل وانا نقرأ في السد ونعاود ، لين عديت الباكالوريا ما فهمتش اش يحب يقول ، ههه ، قاللو هلهبا هلهبا صبحت صاهبا ، ههها ، انا وصاحباتي كي يجي الدرس عليه نقولو :

اليوم عندنا حصة هلهبا وصاهبا .. ويبدأ هاك الأستاذ يتهز ويتنفض ونحنا ما على بالناش ..

وكي نقللك :

راو المسعدي يطرح في السد قضيايا وجودية تتعلق باردة الكائن الإنساني ، وقدرتو على مجابهة الصعاب واثبات ذاتو ، و التحكم في مصيرو ، تقللي :

ووووه على دين امي وووه ، عيشك اخطاني ، مانيش ناقصة تكسير الراس ، راني قعدت نص ساعة في الحجامة فلقتلي راسي ، ما تزيدش تكمل عليا انت ، بلا قاللو شعراء و حكايات فارغة ، فك عاد ، اقلب عليا هالصحن ..

كان حبيتك وانا زاهي وفرحان و نغنيلك في غناية عم اسماعين بين الوديان ، تقللي :

موش حلو ، عاد انت تحب الربوخات حطيت حبوبة خير ، اش بيها غناية روح مالسوق عمار .. 

كان حبيتك ، وفي يدي كسكروت كفتاجي :

 تقللي ، خيت خيييت ، مللى فقري ، هاي حتى كرشك ميش لاقية فيك الخير .. 

كان حبيتك وأنا لابس كسوة موهرة ، تقللي :

موش حلو ، ياخي ماشي لعرس .. خليك كول ..

كان حبيتك وانا لابس دجين ، تقللي :

 شنوه هالتزوفير ، ياخي هذا سروال تقابلني بيه ، لوكان يشوفوني صاحباتي ، تو يقولولي ، ياخي عندك دهينة في الدار .

كان حبيتك وانا محجم لحيتي ، تقللي :

س/با/بوووو/كوم/صا. 

كان حبيتك وأنا مسيب اللحية ، تقللي :

 خيت لحيتك تجيب الشبهات ، تقولش عليك خوانجي .. 

كان حبيتك وقلتلك :

أنا راني من ذراع بن جودر ، متاع آعتصام هاك النهار تقللي :

وجللين ، بكلنا توانسة ،

ومن غدوة ماتهزش عليا التلفون وتبدل البوس ، رغم اللي أنا نعرف اللي أنت أصيلة  سيسب البو عالجد ، ومولودة في سيسب . 

كان حبيتك وقلتلك  :

ما نسمع كان وردة ، وصليحة ، كيف يغنيو من فراق غزالي ، فيسع توللي في المعارضة وتقللي :

موش حلو ، أنا نسمع كان عبد المطلب ، كي يغني الناس المغرمين . 

كان حبيتك وانا عندي كرهبة مضخمة ، تقللي :

بربي كرهبة شكون . 

وكان حبيتك وانا عندي كرهبة مرهزة سيري 75 ، تقللي :

خيييت ، هاي خردة ، وتسميها كرهبة هاذي . 

كان حبيتك و قلتلك :

 فين تسكن ، تقللي :

موش وقتو السؤال هذا .. 

كان حبيتك وقلتلك :

ما تحبش تعرف وين انا نسكن ، تقللي :

نعرفك فين تسكن ..

ونعرف فين تخدم ،

ونعرفك قداش تصور ،

ونعرفك مع شكون تقعد ،

ونعرفك فين تقعد ،

ونعرف عمرك قداش ،

ونعرف البانكة متاعك ،

ونعرف القهوة اللي تقعد فيها ،

ونعرف الطفلة اللي كنت مصوحبها ،

ونعرف بنت خالتك اللي كنت خاطبها ،

ونعرف المتوظفة اللي حبت ترمي عليك بلاها ،

ونعرف قداش مزالك في القرض باش يخلص ،

ونعرف الحزب اللي أنت معاه ،

والحزب اللي يخلص فيك باش تتجسس عالحزب اللي أنت فيه ،

ونعرف بنت المدير اللي حبيت تاخذها ، ولقيتها مع صاحبها في بحذا البلايص ،

ونعرف الهجالة اللي مشيت باش تعمل معاها عمرة ، زعمة زعمة تعمل في الخير ، ورقدت معاها غادي ، وكي روحت قالت لأمها :

اسكت ياميمتي ، لقيت ولد حلال ، مللي مشينا للي جينا ماخلانيش نهز يدي لراسي ، الليل واش جابك ياليل ونحنا نعملو في التهجد ..

وتلفتت لصاحبتها قالتلها :

أما وخيتي آش نحكيلك ، الليل واش جابك ياليل وهو يمخض فيا ، ألناس تعمل في التراويح ، وهو يعمل في القباحة ..

حتى كيف صاحبتها قالتلها وهي تطرشق في لوبان الحج :

وووه يعطيك ! تو هذا حلو ! 

قالتلها :

بربي اش نعمل لعمري ! عالاقل غادي ما نجيبش لروحي  الشبهات ! وزيد هوما الكل يتهداو بيه ، والا هاذي تقللي محلاه راجلك ! أما ايجا نقللك ، والله النهارين لخرانين شديت روحي بالسيف ، وماخليتوش يعمل حتى شيء !ياشومي قلت ! فلوس العمرة كمبيالاتهم مقيدين على كرومتي ، ونزيد ما نحصلش حتى عمرتين والا ثلاثة !

وسمعت صاحبتها تسأل فيها :

اشنوه كبير والا صغير زعمه !؟

قالتلها :

يعطيك اش باش يقول فمي ، نعرفك راني ، ديمة نيتك مطبسة ، وما تلوج كان عالكاليبروات..

ومسكتتلهاش صاحبتها قالتلها  :

تي اشبيك هكا ، وين مشى بيك مخك ، نسأل على عمرو ..

قالتلها :

اشنوه ! ناوية عليه !؟ هاهاها .. انا راني مانيش مغيارة ! قللي ، كان تحب العمرة الجاية نمشيو جميع ونهزوه معانا !

قالتلها :

وووه يعطيك ، والله شهيتني  ! 

ياخي طبست عليها الحاجة وقالتلها : 

 شهيتك في العمرة والا فيه !؟

ضحكت وقالتلها : 

باش تقتلني بالضحك . في لثنين ، في لثنين  ، هو والعمرة !

بالك تحسبني درويشه وبنت باب الله ، ااااه ، رد بالك ، راني طايحة مالسلوم ومكردغة ، ولحمي مر ، واعرف مع اشكون تلعب ..

نعرف راني كل شيء  ..

ونعرفك علاش تمشي وعلاش تجي  ..

ونعرفك وين تحب توصل  ..

بره ابعدني وزيد اقرا دروسك مليح .. 

بره آمش ألعب بعيد .. 

راك ما تلعبنيش ..