ما أمر هالعيشة ياعيشة .. النهار باين من صباحو

 عيشة حمات الطابونة. وخرجت الكسرة سخونة تشهي . تستنى في الراجل باش يجي مالسوق . باش تطيب الزهومة 

، كيما اتفاهموا البارح في الليل ، وهو متمرفق بحذاها ، وبراد التاي يركرك قدامهم يسمعوا في الراديو ، مسلسل الحاج كلوف .

قالتلو :

جيبلنا حتى رطيل غلمي ، عندنا برشه ما  طيبناش مرقة بلحم العلوش ، واني عجنت السميد باش غدوة ننوض بكري معاك ، انت تقصد ربي للسوق ، واني نحمي الطابونة

قاللها :

 الله يبارك والخضرة كي العادة ماو،

قالتلو عيشة :

كي العادة ، اش عندك ما تزيد ، وما تنساش الفلفل الشايح ، رانا ما عندناش باش نطيبو . الماكلة بلا فلفل تجي حاشا نعيمة  ربي ماسطة لاسطة .

وكان العمل هكاكا ...

بره هاو تو يروح العمري مالسوق  ، هاو تو يجي العمري ، استنات عيشة ، استنات ، كملت شوارها ، خذات المثتان فرحت البيت ، لمت الحوش ، خرجت الروث متاع البقرة للزبلة البرة في الزريبة ، قدام الدار ، وسيبت رباط البقرة ، وقادتها لبره للزريبة  ، وربطتها في الموثق في طرف الزريبة ،  حطتلها التبن ، ودخلت ، سخنت نحاسة المي ، بلت شعرها  وعملتلو طلية بالطفل ، وصبت المي على لحمها ، وعملت طلية بالصابون الممسك ، نوع بالموليف بريحة القرنفل ، ومن بعد عملت تشليلة ، وجبدت الفوطة ، نشفت لحمها وشعرها ومشطتو وضفرتو ، مالا ، ماو اليوم سوق ، والعمري ، راجلها ، كي العادة ، ما ينساش اللوبان ، والكاكاوية ، واللوز ، باش دوب ما يليل الليل ، يتعشاو ، ويسهروا ، و يسمعوا حلقة من سلسلة  "اختبر ذكاءك " في الراديون ، ومن بعد يفزوا ، ينحيوا جرودهم ، ويطلعوا عالدكانة ، وتبدأ رحلتهم الليلية مع البوس والتعنيق ، والضحك ، والشيخات ، وما تسمع كان اسواطهم جايه من بعيد ، وبدأ طرح الشيخات والزهو واللهيث :

 ويزي ياراجل احشم  .. ووه ، ياخي ما تعرفش تعف ، نعرفك راني كي تشد ما عادش تسيب ،  غدوة عندك خدمة راك وباش تنوض مالفجاري ، دبر راسك ، هاني قلتلك ..

وتحط صدرها على صدرو ، وتسلم روحها ، لين تولي خيط ..  استنات عيشة ..

هاو تو يجي العمري ، شيء  .

قيلت القايلة والعمري ما جاش ..

عشات العشية والعمري ما روحش .. 

الناس الكل روحت . اللي عالبسكلات ، واللي عالبهيم ، واللي في الكرهبة الخضراء ،

حتى من رابح مروح عالكاليس متاعو ، بعدما تسوق .

ورابح ، عندو مجريشة اولاد وبنات ، اشبيك ، السيد خوذ طلق ، خوذ طبق ، وزيد عندو على ذمتو ثلاثة نساء .

بحيث سي جابر ما يقضي كان كي السوق يخف وتهبط الاسوام ، وقتها يقضي قضيتو ، وعلى هةذاكا هو آخر واحد تقريب  يروح مالسوق . 

ياعيشة وسع بالك هاو تو  يجي الراجل ..

ياعيشة شوية صبر ، والغايب حجتو معاه ، هاو تو يجي الرويجل ..

شيء .. لا راجل ولا رويجل ..

قالت زعمة هالزهمولة ميش زهمولتو ..

 نستنى بالكش تو يطل بين حين وحين .. 

كسرة الطابونة بردت ..

دخلت عيشة للحوش . حطت داقرة الزيت ، جبدت كعيبات زيتون ، وقرينات فلفل املح ، كلات النصيب اللي كتب .. الحال ربيع ، قالت عيشة نمشي نحلب البقرة ، وهاي الشمس قريب تطيح والليل قريب يليل ، ونمشي نتكب نرقد ، يجي والا لا يجعلو باش جاء . 

مع طياح الشمس ، رجع العمري ، مروح يكركر في رجليه ، دق الباب .. عيشة خذاتها عينها  ورقدت ، تعبت ، وما سمعتش الدقان عالباب  !

العمري عيط :

ياعيشة  .. ياعيشة . 

نبحت الكلبة . عاود نادى :

 ياعيشة حل الباب . ياعيشة حل الباب ،،،

بعد وين ووين ، سمعت عيشة الدقان عالباب ، ونبيح  الكلبة ، تكسلت فركت عينيها ، وقامت ، وحلت باب البيت ومن بعد حلت باب الحوش .. 

العمري حمق عليها وصاح   :

يا كلبة يابنت الكلب ، قريب نكسر الباب ، وصوتي قريب يبح.، وانت في سابع نومة ، الصياح متاعي ، ونبيح الكلبة ينوضو رقود الجبانة ، وبالكش راهم تفجعوا .. 

تغششت عيشة وطلع الدم لراسها وقالتلو :

ماكش باش تزي مالوطاية متاعك ، موش قلتلك مليون مرة ياعمري ، بيا  وامي ما تجبدهمش على لسانك لا بالمليح ولا بالدوني ، ايا ضم عليا فمك تره ، ما تقليش ياخي اشبيك لتوه ، اشنية هالغطسة غطستها ، ياخي قعدت تلم في فضلة السوق .

قاللها العمري :

اسكت عليا ، اسكت برك ياعيشة !  اللي جرى فيا اليوم ما جرى لحد .. 

قالتلو عيشة  :

 هاني سكتت وهاني داخلة باش  نتكب نرقد !

قاللها :

 ما طيبت شيء ؟

قالتلو  :

على قضيتك اللي جبتها مالسوق !

قاللها :

 نعرفك غضبانة مني ياعيشة ، اما والله موش مني .. العيشة كلية ياعيشة !

 غناتو .. ودخلت تكبت رقدت .

قاللها اشبيك طفيت الفنار .

قالتلو  :

اخي ما فيبالكش اللي الغاز وفا ، وآخر قطرة صبيناها البارح . لا عاد عندنا غاز لا للبابور ولا للفنار ! 

قاللها :

سكرتها ياعيشة  .. سودتها ياعيشة .. حتى هو نهار أحرف من أولو .. والله عارفو نهار مسود من صباحو ، وين نصبح عالهاني ولد خالتك ، يطلع لي نهار والعياذ بالله !

قالتلو :

اشبيه الهاني ولد خالتي ، ايا تره ، حدك ثم ، ما تجبدليش الفاميليا متاعي . 

قاللها العمري  :

 ياخي ما تسألنيش ياعيشة لا اشبيك ، لا كي سبتك ، لا علاش وخرت ، لا علاش ما تسوقتش !

قالتلو  :

 جيتك من جناب ربي أسكت وخليني نتكب نرقد ! 

 قاللها :

 مستانسه كل سوق ، نلقاك مسوكة ، محمرة ، مكحلة ، محرقصة ، مفوحة ، اش توتى عليك اليوم ياعيشة ! 

قالتلو :

 نسوك ونحمر على خيبتك وكبان سعدي !

قاللها العمري :

 ياعيشة ! والله العيشة كلبة ياعيشة ! خللي واسكت بركه ، الغريبة اللي جراتلي اليوم نحكيها لحفار قبري .. 

عيشه مشات في سابع نومه ...

وهو قعد يحكي ..

اسكت برك ، ماني جيت نضرب عالفلوس لقيت يدي والصحة . قلت زعمة الفلوس تسرقت . وشكون اللي سقط عليا .

راقدة عيشة ما جابتوش ..

دزها بمرفقو . فاقت قاللها :

 ياخي شخرت فرد مرد . الفلوس انت بيدك حطيتهم في جيب البلوزة الدخلاني . 

قالتلو :

 ايه .. يا شومي ، الفلوس حطيتهملك في جيب البلوزة الدخلاني .

قاللها  :

لبست البلوزة ، وين خلطت للسوق ، حطيت يدي في الجيب

ما لقيت شيء .

قالتلو عيشة :

 اشنعتي كان . نهار مشوم على عيشة ، وين مشيت الفلوس ياعمري ، الفلوس اني بيدي حطيتهملك في جيب البلوزة الدخلاني . تكونش ياعمري ، تربعت في حانوت مالحوانت ، 

وقمرت بيهم ، ماني من سعدي المكبوب معرسة بواحد من عيله واطية ..

وتقعدت عيشة وتربعت ، وبدأت تخبط على فخاذها وكملت :

ياكبان سعدك ياعيشة ، كان انت قعدت ضحكه بين اندادك ، يا ناري عليك يا عيشه ، اناهي دعوة الشر اللي طاحت فيا ، راني جيت باش نقول لا قلت ايه ..

قاللها بصوت رايض كاينو يتوسللها باش تنقص مالصياح والتعديد  :

ياعيشه ريض روحك ، اشبيك شعلت فيا فتيلة بلا زيت ، هاي البلوزة المشقوقة وزيد فركس بيدك .

قالتلو عيشة  :

البلوزة المشقوقة ! انا بلوزه مشقوقه زاده ! الفلوس حطيتهملك في البلوزة القراية الشخمة  المدورة ، اللي مستانس تمشي بيها للسوق !

تنطر العمري فرد تنطيرة . وحل باب البيت ، وقعد في العتبة ، وبدأ يلطم في وجهو ، ويخبط على ركايبو ، ولوح الكبوس على طول يدو في الحوش ، خلطت عليه عيشة ، مدتلو البلوزة الشخمة اللي مستانس يلبسها نهار السوق و قالتلو :

 هيا ادخل ارقد . ومدتلو الفلوس .

كمل التخبيط بيديه على ركايبو وقاللها  :

حتى هي عيشة كلية ياعيشة . قلتلك النهار بان من صباحو ، مللي ريت هاك الزفت عرفتو نهار أزرق .. رصاتلي ماشي جاي عالثنية ياعيشة مرتين مالسوق للدشرة ومالدشرة للسوق واني كي المهبول ، راني مرتين نوصل حتى لقدام الدار .. واني نثبت في الثنية شبر شبر .. شي النافع ربي ..عاد قلتلي ياعيشه  راهي الفلوس في البلوزة الشخمة الدورة  اش عملتلك ياعيشة ، الله غالب هاذاكا مغرفتي اش هزت ، ياعيشة ، راهو خلاص كانزه كاملة ، كانزه والعمر جد اصلو منحي ، يتكب ويتقعد ، نكلت على جدودي اللي خلاوني  ، يمشيو هكاكا  لا نايحة لا دفينة ، علاش تره ، اش عملت في عمري الكلب ، ما يزينيش وجه ولد خالتك لحرف تزيد انت على ما بيا .. عندها الحق العزوزة امي كي قالتلي العيشة مع عيشة باش تطلع حرفة ..

امي قالت الحق ياعيشه  ..

الله يرحمك يامي ..

 قالتلو عيشة  :

 الله يرحمها يفعلها ، حتى هيا كانت كي تطلعلها الكلبة بنت الكلب على بي لزهر ، تبيتو في مخزن التين .. هيا ادخل وتكب ارقد ، والا نعملك ما عملت المرحومة امك لبيك ..