الامور ماهياش قد بعضها ، والناس ضجت مالغلاء والمكوس اللي مسلطة على رقاب الرعية ، والواحد مالرعية كي توصل بيه الحال ويوللي ما عادش خالط لا على قوتو ولا على قوت عيالو ، وتضياق بيه الدنيا ، لا عاد يفهم لا شيخ ولا سباييس ، لا صبايحي ولا كاهية ، لا خليفة ولا قايد ، لا وزير لا باي ولا بعرور ، يستوى عندو الحال !
المسأله وصلت لمواصلها .. اسيدي ! وما عاد بيها وين ، الدنيا شاعله ، والعباد هايجه في الدشر وفي النجوع ، والعروش غضبت وهاجت وضجت ، في الريف وفي الحضر ما تحكيش اش صاير ! الحاصيلو ، من شليلها لمليلها ، الايالة عبارة على طنجره والا برمه والا قدره تغلي !
سيدنا ، مولى الكرسي ، وصللو النبأ ،، حمارت عينيه وتهز وتحط ، وحط يديه وراه ، وحرث السرايه بالمشي والجي ، وهو هايض غايضتو الامور ، وكشاكشو خرجت ووللى يهدر كي الجمل ! الحاشيه متاعو لبدت ، بحجابها بكباراتها بصغاراتها بنساوينها برجالتها !
اش قاللك واش قلتلك ، سيدنا داير بيه الدجاج لكحل ، وكي يدور الدجاج لكحل بسيدنا ، يجن جنونو ، ويخرج من سينتو ، يزراق و يحمار ، وتركبو العفارت السبعة ، ويوللي ربي ما يعرفوش !
استغفر الله العظيم ! عوذ بالله مالشيطان الرجيم !
نحا الشاشية الماجيدي متاعو ، ولوحها درا كيفاش ، ونحا سيفو خذاه من عندو الحاجب وقعد على كرسيه فيسع جابولو القهوه ، وعمرولو السبسي متاعو ، بلغولو في الدوزه شويه ، حطولو حلاب الماء ، الخادم متاعو يقعد شويه ويوشوشلو يقللو :
سيدنا ارتاحش ! والا تحب جلالتك على سبسي اخر ! سيدنا راهو موش باهيلك الغش ! يعطيهم ويجيهم . ان شاء الله كيه تكويهم في جواجيهم هكاكه ونشوف فيهم نهار .. اللي عملوا فيك هكا ! انشاء اللهسيدي محرز سلطان المدينه يدقهم دقه وحده ! وبدأ يعدد :
اللطف على سيدنا ! الله لا يوجعني فيك ياسيدنا ! ان شاء الله نهاري قبل نهارك ياسيدنا ياباهي ياغالي ! يعليك على من يعاديك ! ويثبت مقامك وزين ايامك ! والله للا البيه تهبط فيهم حيار ولا حاليلها طعام ولا جايها نوم مسكينة ! هاك الليلية دخلت عليها نلقاها مسكينة تنوح بالسوط ، قالتلي غايضني سيدنا يامصباح ! والله نلبس فيها في حوايجها وهي تبكي !
وطبس عليه قاللو :
سيدي هاذي ماتكون كان نفس ! الخديمة مبروكه عملتلك خلطه متاع بخور اللي يقللك .. بخور من بيت ربي و النبي العطارة متاع المدينه خيرولها احسن ما فما حتى امين العطاره كان معاها ! ورأس سيدي محرز لو كان تعمللك تبخيره تو يتنحى عليك الكساد والكبر والهم ويمشي عليك هالغم وتزهى احوالك ! والله ياسيدي مع السبسي اللي عملتو ما تقوم من عالكرسي كان زاهي وفرحان وشايخ !
الحاجب ، مخصي وتربية نساء ، درا منين لقطاع وتربى بين المحضيات وعرف دواخل السرايا ومداخل اهل السرايا !
قاللو سيدنا :
ما يسالش البخور باهي . ينحي البغض ويجلي لكدار ويفوح الديار .. قوللها قوللها !
طبس عليه قاللو :
حاضر سيدي ! حتى كان تحبها تحبها ترقيك .. ترقيك زاده ! ورجع يعدد :
ياناري عليا ! اشكون بيا الليلة . لو كان موش انت ياسيدي وتاج راسي !
درا كيفاش مولى الكرسي تقلب قلبه وحده وتغشش وقاللو :
هاك وليت تشخر ! اسمع . منو هكا . كي نكملو ، ونكبس تكة القندليسة ، بدل عليا وجهك ، ما ترقدش بحذايا في الفرش ، تطيرلي نومي . عود امش تكب في المقصورة وكي نعيطلك ايجاني !
هكاكه ودخلت مبروكه والكانون في يدها وبدا البخور عامل عجعاجي ! مولى الكرسي وللى يكحكح وقال :
اشنوه ياكازي غمبقتها عليا ، حلو عليا الشباك وكمل فيسع..
وفيسع بدل عليا منظرك لحرف !
دارت مبروكه بمولى الكرسي سبعه مرات ، والكانون في يدها وهي تتمتم درا فاش تحكي ، من بعد بخرت التراكن . وخرجت تولول :
يعيش سيدنا ! الله يجللي لكدار على سيدنا !
مولى الكرسي تعدلت احوالو قال للفاسد متاعو :
اشنوه سيدي تحبني نبات بعلتي ! عيطلي للوزير لكبر وحضرولي بقية الوزر ! خليني نشنعهم ونكبلهم سعودهم !
حظر الوزير لكبر ، واحد نمس اللي هو ، عطا كار السلطنة وربع يديه ودنكس راسو ! تسيب عليه مولى الكرسي ! وقام يصهل عليه ، وسخسخو بالدعاء ، وعايرو بامو وببوه سايس الخيل ، وبجدو اللي كان يخدم قواد لجد مولى الكرسي ، وبمرتو ، اللي كانت محضيه عندو وهداهالو على خاطر فد منها، حاصيلو لا خللى فيه لا بقى ، والوزير لكبر هاك الحجرة تتكلمش هو هكاكه عزوزه ما يهمها قرص !
تلفت للفاسد متاعو وقال :
عيطولي لمكابيب السعد لخرين !
طبس عليه الفاسد متاعو قاللو :
سيدي ! شد لسانك شويه ! راو فيهم وزرة نساء !
مولى الكرسي تهز وتحط وقال للوزير لكبر متاعو :
يافضيحتي يافضيحتي ! لوكان تسمع نانا الكبيرة ! نساء فرد مره ! حكومتي فيها نساء ! باللازمة الا مانبخرلك بريحتك ياولد الفاعلة التاركه ! اه وتحب العروش ما تقومش عليا سي الكلب ! وتحب الايالة ماتوليش تغلي !
طبس عليه الفاسد متاعو قاللو :
سيدي ! راك انت مصحح في الأمر العلي وانت اللي مسميهم !
قال مولى الكرسي :
نصار هو انا اللي مسميهم ! ايا باهي جيت في الشفاعة !
دخلوا الوزر كل واحد يعطي كار السلطنة وياقف !
قاللهم مولى الكرسي :
تو الاياله تغلى اش تحبوني نعمللكم توه !؟
قام واحد عودو رقيق ولابس بابيون كي الروامه قاللو :
سيدنا كان تسمح انا عندي حل !
مولى الكرسي تقشع لتالي وخزرلو خزره حرشه وقاللو :
انت متاع شنوه ياولدي !؟
قاللو :
سيدي انا متاع الثقافة !
شنوه شنوه .. شمعناها ثقافة سيدي ! ومن وقتاش وللى عندي هالتقفطين ! اه .. اه .. تفكرت انت متاع التلبيق ..
قاللو متاع الثقافة اللي هو واحد سكبان ورمز :
بالضبط سيدنا انا هو متاع التلبيق ! وهيا توه تتسمى الثقافة ، يعني شويه مألوف ومدايح لسيدنا ! عاد السنا عملنا مشروع ضخم وكبير سميناه نوبة البايليك ! تقول جلالتكم علاش الأدعية والمداءح والأذكار ما تتعمل كان لسيدي بوسعيد والا لسيدي بلحسن والا للا ام الزين وللا المنوبية ، والا لسيدي المازري والا لسيدي بوعكازين وسيدي بوقبرين وسيدي عبيش وسيدي عبد القادر وسيدي بولبابة ورجال القروان ماو زاده مولى الايالة عز الله مقامو لازمنا نعملولو نوبتو باش نخلدو ذكرو بين الأهالي رعية سيدنا ربي يديم حياتو ويعللي مقدارو وينصرو على من يعاديه ..
مولى الكرسي تهز وتحط وزهى وشاخ وقاللو :
اثرنتك ملسن ! وقداش تجيب وتجلب ! هاك ماشاء الله عليك حافظ مليح ! يعطيك الصحة ! مالا توكلوا على الله ! نحبكم تبداو فيه فيسع ! خللي الشعب يزهى ويتفرهد في الصيفية هاذي ويبدل الساعه بساعه أخرى ! ويزيه مالكبي والتقلقيل ! وكان ممكن اعملوه في التياترو اللي دروجو حجر نحب نشوف رعيتي زاهية وتنسى الهموم ! اسمع .. ماذا بيك ما تنساش شويه تلبيق غناء وشطيح .. الرعية راهي كي تلقى الزهو والطرب تسيب اللي في يديها وتبدا النبي مولاك !
( نكملو البقية المره الجاية )
Aucun commentaire:
Enregistrer un commentaire