اخر وظيف تقلدو سي عمر مدير لمركز الأرشيف والمحفوظات النادرة والسرية والمهمة . برشه من زملاؤه اعتبرو هالوظيف نوع مالتجميد . وفي عوض اللي يجيو يهنيوه جاو يواسيو فيه . قاللهم :
بالعكس . انتوما لازمكم تهنيوني على هالترقية . ماشاء الله طلعت في السلم وتزادتلي في الشهرية وفي المنح وفي بونوات الايسونص . وفوق هذا ودنو انا في اخر الكاريار . ما عاد ما مزالي عويم ونقوللكم باي باي .
الايام حل عينك غمضها . خرج في التقاعد . قال بينو وبين روحو اش باش نعمل . انا مانحبش قعدت الدار وما نحبش قعدت القهوة . قال الا مريم مولات البيت :
اش رايك لوكان نعمل مشروع !؟
قالتلو :
والله عملت بالرأي . لخره تحرك الدم وما تقعدش قاعد ! اما خممتش شنوه المشروع اللي باش تعملو !؟
قاللها :
عندي سنين وانا نخمم فيه .
قالتلو :
تره قللي شنوه !
قاللها :
حانوت مختص في بيع الببغاوات !
قالتلو :
وه ! .. ببغاوات ! ما حلاني قدام صاحباتي ! قال شنوه قال مسكينة راجلها مللي كان مدير عام .. حل حانوت متاع عصافر !
قاللها :
يابنتي ببغاوات .. ببغاوات .. موش عصافر !
قالتلو :
محلاك عاد وانت بين القفصات ! واللي متعدي يقللك بربي ميات غرام زيوان ! والا بقداش هالعصيفر ! لا حتى هاذي حلوه ! شوف . هاني ننبه عليك لوكان تعملها الا ما نخليلك الدار واسعة وعريضة ونمشي بحذا واحد من أولادي !
وصار ما صار بين سي عمر وللا مريم . ماي حتى هي زاده متوظفة معروفة ومعتبره وتولي وتعزل وعندها كلمة لا ترد في وزارة درا شنوه !
حاصيلو المشكلة وصلت لولدهم الكبير ، ما كانش مالعاكسين كلم خوه واختو وكلم خواتو لثنين عالسكايب في النمسا وفي فنلندا وتواعدو باش يعملو جلسة لفض الخصومة بين امو وبوه .
بوه قاللو :
الله يهديك ياوليدي . طول عمرك كيف امك ! ما تتبلش في فمك فولة . احنا قلنا انت الكبير وتقعد المسالة بيناتنا . اذا بيك فزعت أخواتك بنساهم برجالهم !
قاللو سمير ولدو :
ماك تعرف يابابا ما نحبش نتحمل المسؤولية وحدي !
قاللو بوه :
لا ما قصرتش . تقوم تعمللنا مجلس امن على خاطر حكاية بسيطة امك الله يهديها مكبرتها ! اشفيها كان حليت حانوت وبعت فيه الببغاوات . مشكلة هاذي !؟
قاللو سمير :
اشنوه يابابا . ياخي تحب نقولو الحق والا ولد عمو . حلوه هالطلعة اللي طلعتلنا بيها . تو يعجبك يتلفتولي الناس يقولو عليا سي سمير ولد بياع الببغاوات ! حتى من بنت اختك تقلقت ! قالتلي مللى طلعه طلع بيها خالي . اش يقولو الناس علينا وعالاولاد !
قاللو بوه :
مالا حتى حبيبة وصللها الخبر !
قاللو سمير :
وعمتي وراجل عمتي وخواتك الكل على بالهم واولادهم زاده حتى من اخوالي واولادهم في بالهم . تي شبيك يابابا راك خلوضت الدنيا بهالطلعة . ما احلاك وانت في حانوت توكل في الببغويات وتسقي فيهم وتبيع في الزيوان . لا حلوه برشه . بصراحة عندها الحق امي ! بخلوط للا مريم قالتلو :
ريت ماو هاوكا الحمد لله موش انا برك ولدك الكبير زاده .
ولدو حمزة اللي في النمسا قاللهم عالسكايب بين الحد والفدلكة :
والله لاكم فاهمين بابا . الراجل ما قرر باش يعمل هكا كان ما يكون عندو فلسفة في الحكاية ! افهموه واسمعوه !
قام ولدو حمودة مالبر لآخر يضحك وقاللهم :
والله كلام حمزه فيه برشه صواب . بابا راكم ما تعرفوهش !الراجل راهو موش قاعد يفكر في مشروع تجاري على خاطر موش محتاج للفلوس هو عندو مشروع فلسفي !
قامت للا مريم قالتلهم :
لا يحقلكم حق لثنين ! بوكم ناقص وزيدو احشيولو راسو بالهبال متاعكم ! توه عقاب عمرو باش تطلعو فيه اشاعة فيلسوف ! .. تحبو تردوه عقاب عمرو كاراكوز والناس تتضيحك علينا . لا. حتى هاذي حلوه !
وسكرت الحاسوب وهي متنرفزه !
لكن سي عمر ما سكتش بعد اللي سمعو . قاللهم :
هي على كل حال فكرة قررت باش نطبقها . نجحت ياحبذا ما نجحتش مخزن مسكر ولا كرية مشومه !
وخرجهم الناس الكل مثرثرين !
قالتلهم للا مريم :
راني نعرفو راسو صحيح . وما يبات كان على غرضو !
قالتلها بنتها وهي تبوس فيها :
ياماما . تو بابا جاك جديد ! ماك تعرفو . وسع بالك معاه وعديلو بهبالو .
سي عمر يسمع فيها قاللها :
صحيت للا . بوك وللى مهبول . ما قصرتش .
رجعلو نسيبو باسو من جبهتو . وقاللو :
يكون منك العقل ياعم عمر بنتك وتعرفها . الله غالب ساعات ما تعرفش تختار كلامها . والله انت سيد العاقلين ربي يحفظك لينا انت وطاطا مريم الغالية .
وخرج وهو يجبد في مرتو قاللها :
هيا فيسع للا باش توحلنا مع بوك . الله يهديه سي سمير خوك ما لقى ما يعمل !
( نكملو الحكاية وقت آخر )
Aucun commentaire:
Enregistrer un commentaire