قمت الصباح كي العادة بكري ، خذيت البتي/داج متاعي ، ومن بعد عملت قهوة ززوة ، ومشيت للصالة ، حطيت القهوة عالطاولة الصغيرة بحذا الديفون ، قريب للبورت/فوناتر ، ومن بعد طلعت شوية الريدو ، باش ننجم نشوف وجه الصباح ، بالأخص الصالة متاعي شرقي ، الشيء اللي يمكنني باش نشوف الدنيا البراح اللي قدامي ، على فكرة ، الصالة زاده تطل على جنينة عمومية ، البلدية لاهية بيها لهوة خاصة ، ووجود البرطمان في الطابق الثاني ، يخليني نتمتع بمحيط ومنظر باهي ، زيد على هذا ، ما عنديش في الحقيقة جيران مزعجين .
قعدت عالديفون ، عملت رشفة قهوة ، ورميت عينيا عالمنظر البراني ، قعدت نشوف في مطلع الشمس ، وهي ترمي نورها عالجنينة والشبابك والحيوط والعباد .
شمس الصباح نورها يبعث البهجة والأمل في الروح !
وجات تصويرتو قدامي .ملامح وجهو وشلاغمو ، وشعرو لكحل اللي فيه كعبات شيب ، والفيسته المارون اللي لابسها فوق سورية بيضاء ، والسروال الدجين لزرق .. اووووه حتى انا زاده . شبيني هكا .. اش مجيبو قدامي ..
ثمه ، عالطاولة ، مجلة باري ماتش ، فيها موضوع على جوني هوليداي علاقاتو ، وزيجاتو ، وعايلتو وثروتو ، قريت منو صفحتين ، التلفون رن . عرفتها بنتي ، تطلبني كل صباح ، باش تطمن عليا ، صبحت عليا ، وقالتلي :
ماما . ما تنساش العشا بحذانا . ايجا بكري عاد راهم لولاد مستاحشينك برشه .
خرجت . عملت المارش متاعي . وانا راجعة تعديت عالسوبارات . شفت سالم وحدو . اغتنمت الفرصة ودخلت . صبحت ومشيت خذيت كعبتين ياغرت ، نسيت اللي انا ماخرجتش فلوس معايا قلت لسالم :
من بعد تو نتعدالك .
قاللي :
تفضل مادام . والله صحة ليك في هالسبور اللي تعمل فيه . نقوللها المدام على النشاط متاعك تبارك عليك . تقللي : ملقيتش وقت !
توه سالم عالصباح يحب يحل معايا مستوج . حطلي الكعبتين ياغرت في الصاشي ، خذيتها من عندو وسالتو بطريقة حاولت باش تكون عادية قلتلو :
بربي قللي هاك السيد اللي لقيتو بحذاك البارح يسكن في حومتنا !؟
خزرلي سالم وضحك قاللي :
حتى هو سألني عليك نفس السؤال ، اي نعم مدام ، يسكن في البالاصات اللي مقابلين بالاصاتكم ، في الجهة لخرى مالجنينة . اما ما يضهرش ديما . يعيش في الخارج ، كانت مرتو تجي معاه ومن بعد وللي يجي وحدو يعدي الصيف هنا ، راجل متربي وأخلاقو عالية ، والله كل مره يجي يجيب لعب للاولاد وشكالط وحلوى ، حاصيلو مانحكيلكش يامدام والله لين يحشمني على روحي !
خرجت من عند سالم وانا ما عادش انا !
شبيه السيد يسال عليا ! اشنوه اللي يحب عندي ! هذا الكل من هاك الخزره المجنونة ! السيد وللى قريب يسكن في مخي ! الساعة كنت رايضة على روحي ! جرت هاك المشية للسوبارات ! زعمه اش قاللو عليا سالم ! جاب ربي ما سالتوش اش قال عليا ! والا الضحكة الخبيثة متاعو توللي عندها معنى !
محسوب . زعمه هو ماشلقش كيف سال عليا ! ما نظنش ! راجل كيفو هو ما نتصوروش فريفطه ! فريفطة والا موش فريفطه انا اش يهمني فيه !
ولقيت روحي نحط في المفتاح في باب البرطمان . حليت الباب ودخلت . طول مشيت للدوش عملت ترفريفة . من بعد شيحت شعري .حليت الراديو على اذاعة مالاذاعات . نسمع في وردة تغني : بتونس بيك .. ومن غير ما نفكر . خذيت التلفون كلمت لستيتيسان متاعي . قالتلي :
حنان ! وينك عزيزتي ! طولت الغيبة والا بدلتنا ! حتى السؤال ما تسالش على اختك !
قلتلها :
كليتني بالكلام ! ديما كي عادتك ود ود . خليني لخره نقللك نهارك زين ! ايا قللي وقتاش نجيك العشية ! نسيبلك بدني ، وبالاخص وجهي ! والله ياحلومه ساعات نشوف روحي في المرايا نحس اللي انا خيبت برشه ووليت مسلمه في روحي !
قالتلي حلومه لستيتيسان :
لا عزيتي ! ما نسلموش في رواحنا ! ايجا العشية وقت اللي تحب عزيزتي . اسمع . نحبك تجيني بطولك . ما تجيب معاك حتى شيء . عندي بوماضات تهبل . حتى البارفان من عندي . بارفان جديد من كوكو شانال فيه ريحه بنينة ما نقلكش ..
في قلبي فرحة جديدة . قريب نطير ونجنح !
دخلت لبيت النوم باش نبدل حوايجي . وقفت قدام المرايا . هكاكا عريانة ! قلت شبيه بدني وطولي ووجهي . وزنودي . الحمد لله لا عندي تكميش في وجهي شوية برك تحت العينين تو يتنحى بشوية تمسيد بالبوماضة ، شفت في المرايا تصويرة عيسى معلقة ورايا عند رأسي فوق السرير ! تلفتتلو ووليت نضحك . قلتلو :
هاني كايني باش نقابلك اول مرة .
في بالي نكلم في راجلي . اذا بيها تصويرتو غطات الكواطرو . اوووه . موش معقول ! اشبيني هكا اليوم ! قريب نعمل جوانح ونطير !
نزلت عالناقوس حللي رضا نسيبي الباب . واحد مقعار . ساعات يسيب عليا ركاكتو لين يفددني ويحشمني على روحي . ما يعرفش يعف . شيء . هو شافني . حل عينيه على وسعهم ، وحل فمو علامة البهتة ، وصاح باش يسمع ليلى بنتي :
واو .. اشنوه هذا باتاتا ! اشنوه هالزين والعين ، والقد واللبسة ، والبارفانات اللي ريحتها ترد الروح ، اههههاه .. والمشطة ، مشطة تقتل . والله تقولش عليك انجلينا جولي ! انا انجلينا جولي ، باللازمة لا تجي قدامك شيء ! ايجا ياليلى ! اخلط هاي اختك جات !
ومد وجهو كي العاده باسني ! جات بنتي باستني . حتى هيا ميش ناقصه زادت في الحبل وصلة قالتلو :
والله قلت الحق !
وتلفتتلي وكملت :
ماما اللي يشوفك ما يعطيكش عمرك .. صحة . صحة لماما انسامبل جديد ، وبروش ياعيني ، وصباط جديد ، وبارفان جديد من كوكو شانال ، شريت منو نهار السبت . حلو ياسر ويهبل ..
قلتلهم :
ازيتوش توه مالرويق متاعكم . نعرفكم راهو كي تتقابلو عليا . ايا عيطلي للاولاد توحشتهم . ودخلنا جميع للصالة . جاو لولاد ترماو عليا ، بنتي عندها زوز بنات ووليد ، الوليد هو الوسطاني . تبارك الله عليهم الثلاثة مزيانين ما نحكيش . ربي يفضلهم . قالتلي الطفلة الكبيرة :
مامي انت مزينه هكا ما احلاك . وين ماشية الليلة ياخي . ضحك بوها وقال :
هاذم أولادك قلتش حاجة انا !
تلفتلو . غلب عليا ، وليت نضحك . باش نغطي الحشمة متاعي . قلت بيني بين روحي :
زعمه شموا حاجة ؟
واستعوذت مالشيطان وقلت :
حتى انت مخك وين سرح !
دخلنا لبيت الفطور ، نسيبي خذا من عندي الفيسته ، مشى علقها في القلص . ورجع . جبدلي الكرسي وقعدني وقال بلهجة مسرحية :
العرايس أولا !
حسيت بوجهي حمار ونبهذلت . قالتلي بنتي:
شبيك ماما وجهك حمار . ياخي ماكش مستانسة بتفدليكو !
والله ماما هالليسة والمشطة والماكياج زادو فيك الشطر !
قعد نسيبي بحذا مرتو . شفتو كي مسها بمرفقو وقاللي :
والله ياتاتا ماناقصك كان ترنكوش يشدلك جنبك . هكاكا وندخلوك عروسه . والله الفرقه من عندي وعلى حسابي . غير شاورلي عالعريس برك الا مانخطفو ونجيبهولك جري .
قلتلهم وانا في حالة حشمة كبيره :
زيتوش توه مالفدلكة الماسطة متاعك لثنين ..
وحسيتو كاينو قاعد بحذايا وانا نقللو :
يزي احشم . بنتي وراجلها والصغار يخزرو .
فيسع استرجعت قوتي . وغلبت حشمتي . وتماسكت وخبيت ضعفي وكملت :
اولا كم تسمع . احشمو شويه عاد . ما كانش تو نخليكم ونقوم !
نسيبي ما يعرفش يفك باقي شادد صحيح قاللي :
والله يانانا كي نخزرلك توه نقول تبارك الله عليك ! كاينك انت أخت ليلى موش امها ! بربي قللي يانانا ! اش ناقصك بالله . قد وزين وعين . كانك عالمرحوم ، الله يرحمو لوكان ثمه إمكانية باش نسالوه تو يقلك :
ما تقعدش وحدك ! عاود حياتك ياحنان يا عزيزتي ! تمتع بشبابك !
باقي في نفس الحلقة . اشبيني بين نهار وليلة كياني تشقلب . اش جرالي . اشبيهم لولاد جبدولي حكاية العرس . اشبيها حلومة بعدما كملت قالتلي :
والله تبارك الله عليك خرجت تهبل ! حنان عزيزتي . اتلهى بروحك ياديني . الى متى وانت قاعده هكا تبوم وحدك ، بين اربعة حيوط . جدد حياتك . المرا منا ياعزيزتي لازمها راجل يونسها .
وكملت بخبث وهي تعنق فيا قدام باب الخروج :
حنان عزيزتي . مازال في زنودنا ما تعريو راهو !
قلتلها من غير ما نشعر :
اللي فيه الرضا والخير ربي يسهل فيه . وكي يكتب المكتوب ماناش باش نسكرو الباب .
( نواصلو كمالة أوراق الخريف في مناسبة أخرى )
--------------------------------------
( ** ) تدوينة نشرت في 24 ماي 2018
Aucun commentaire:
Enregistrer un commentaire