وقت اللي قررت باش نحب ..

يحكي .. ما نعرفش لشكون يحكي .. قال : 

وقت اللي قررت باش نحب .. وأنا في هاك الزمان البعيد .. البعيد ياكبدي .

حبيت وحده وقلت هاذي عليها نموت ومنها نخلق وفيها حياتي وموتي  ..

أمي .. خزرتلي خزرة حرشة .. قالتلي : 

ماو شاور بوك .. هكاكا لا طاح دزوه .. تحب وتختار وتموت وتحيا في طفلة لا نعرفوها لا نعرفو عيلتها لا اصلها لا فصلها .. ياخي الأمور مسيبة .. وانت ياسيدي مازلت تقرا ..

أمي نعرفها عاملة خطة .. مرا .. تعرف اتكتك.. وبابا يخدم على روحو مالصباح لليل ، يروح مهدود ، يتعشى ويشرب كاس تاي ويعمل سويقر ويتفرج في الأخبار ، بعد ما يشوف التصاور متاع الوزر والحكام يقول : 

تفوه على جد أصلكم واحد واحد بالحرام لكلكم تكذبوا وتسفهو وتنهبو في البلاد . 

ومن بعد يتلفتلنا وهو في هاك الحالة متاع الغش ويقوللنا : 

اسمعو .. ردوا بالكم تقولو هكا في الشارع .. وألا تتحدثوا في السياسة .. نحبكم ما تتلهاو كان بقرايتكم .. أقراو وانجحوا وخوذوا شهايدكم ومن بعد يعمل الله ..

الحاصيلو قرينا ونجحنا وتخرجنا وخدمنا .. وقلت لامي :

 نحب ناخذها ..

قالتلي :

بنات الناس لعبة هيا .. ياخي الماخذه ساهلة والعرس ما يلزموش مصروف وبوك يد واحدة ما عندو منين بش يعرسلك ..

قلتلها :

 يا أمي العزيزة .. الطفلة راهي باش تطير من يديا .. وانا حبيتها ..

قالتلي :

 ياخي تعرفها ؟

قلتلها : 

لا

قالتلي : 

تعرف عايلتها ؟

قلتلها : 

لا 

قالتلي :

تعرفش بنت أشكون ؟

قلتلها : 

لا 

قالتلي : 

غدوة كان عشنا الوقيت هذا نمشيو نخطبو .

فرحت وشخت وزهيت وشطحت وغنيت . 

من غدوة عالصباح مشيت شريت كسوة قمقومة . وصباط بهاك الحسبة . روح بابا بكري مالخدمة . دوش وعاود حجم لحيتو . وقاللي : 

ايا ولدي بره شدلنا تاكسي .

خرجت وقفت تاكسي . ركبنا . التاكسيست قال : 

 وين على خير ؟

بابا قاللي : 

قللو وين قاصدين ربي .

تربثت . معرفتش آش نقول لبابا. معرفتش وين تسكن . ما عرفتش فين تعيش . مرة واحدة شفتها في الباتيسري . تاكل في كعبة ميلفاي هي ووحدة صاحبتها . قربتلها . قلتلها : 

ماحلاك وماحلى قدك وماحلى زينك وماحلى عينيك . 

تلفتتلي . هزتني حطتني . وضحكت وقالتلي : 

بقلة على لونك .

وخرجت هيا وصاحبتها وركبت في كرهبتها وخزرتلي خزرة لتو ما زلت نتفكرها ومدتلي لسانها ، وخدمت كرهبتها وخرجت بديماراج أميركان . خلفت وراها حس وتزرييط . قال واحد مالجماعة اللي بحذايا : 

يا خويا . داخل على جبل بقادومة .

من ساعتها وانا نحلم بيها .

بابا . دغرني من تالي ونزر وقاللي : 

أيا مكش باش تقوللنا وين ؟

قالتلو أمي :

 ياراجل يزي . ولدك حشم منك . مانا ماشين لدار أختك . لازم نقولو هنا بير .

كيف وصلت نلقى الأمور الكلها منظمة . وخواتي سبقونا . 

قال راجل عمتي ، يحب يفدلك  : 

شوفو هالصغار ياسيدي . الواحد الماء يلعب تحت ساقيه وهو موش فايق . باللازمة ما سمعت كان البارح من أختك .

قاللو بابا : 

ربها واحد يانسيبي العزيز . أنا تو سمعت في التاكسي .

وسكت الراجل.

 الترينو  وقف . تلفتلي وقاللي : 

بربي ميش حكاية تضحك .. حكايتي .. ؟

وبلعتنا زحمة المحطة .