وحنا صغار ، في هاك الزمان البعيد ، وقت كانت "حبيبتنا" الميزيرية باركه علينا ليل ونهار ، وكنا رغم بركتها علينا ، نمارسو عليها في تحدي ومقاومة شرسه وعنيدة ، سلاحنا في هاك المقاومة كان يتكون من زوز اسلحة جبارة اقوى من كل اسلحة الميزيرة ومن كل اسلحة الدنيا اللي تتسمى توه اسلحة الدمار الشامل ، كان الصبر والسخرية الضاحكة ، هوما السلاحين المدمرين اللي واجهنا بيهم ايام البؤس والميزيرية والشقاء ، وتنجم تقول غلبنا الميزيرية ودمرناها ، وخليناها مسخرة واضحوكة للأحياء اللي جاو من بعدنا وما لقاو ما يشوفو منها حتى شيء ، إنما يسمعوا بيها ويتحكالهم عليها خرافة من خرافات الزمان اللي كان .
عاد في هاك الزمان ، كان ثمه شكون من أهالي دشرتنا ، اللي ناب عليهم ربي بوظيف ، سواء في العاصمة والا في مدن اخرى مالايالة التونسية ، على خاطرو قرأ شوية ووللى ينجم يقول : مسيو ! و افو/زوردر ! يعني : سيدي ! وحاضر سيدي ! وأمرك سيدي ! ماو حتى مستخدمين هاك الزمان ، كانوا ياكلو فيها بعصاة الذل .. والا انا غالط ! كان انا غالط قولولي خلليني نصلح روحي !
عاد نهار شاشت الدشره متاعنا ، اش قاللك واش قلتلك ، بيك الهاني ، طالع يتكرم ، وهو شادد العكاز متاعو ، وكشاكشو خارجه ، اللي عرضتو لولانية قالتلو :
اشبيك يابي الهاني . ماك لابأس .
حمق في وجهها وصاح فرد صيحه وقاللها :
اشبيني للا جيتك نشكي ! ايا فوتني ويزي مالتملقيط متاع الملاهط تره ! مازلت كان انت باش تسالني اشبيا واش ما بياش مللى زنوس والله !
المرا ما ينقصهاش طول اللسان والدم البارد والتفيسيخ حبت تزيد تشيخ عليه وتطلعلو الكلبة بنت الكلب وفي نفس الوقت حكرت اللي هو راجل كبير ما طولتش لساننا عليه اما حبت تزيد تطيرهالو قالتلو :
سامحني غلطت معاك يابي الهاني ، اما شفتك تتكرم وكشاكشك خارجة ، وانت ترمي في عكازك يمينا/ويسارا ومبهذل ، قلت بالكش داد منانة ، كيف العادة عملتلك طريح عالصباح ، ماك حتى انت يابي الهاني ، كثرت على ما وصاووك ، نهار كامل وانت من حيط لحيط ، لا خدمه لا زدمه ، خالتي منانة فدت ، قداش منها يارسول الله ، راهو الحق يزوك منو البقر !
صاح بيك الهاني وهز عكازو وقاللها :
ايا باش تبدل وجهك من قدامي والا باللازمة تو نشد نمسدك بالزلاط ، ونوريك التفيسيخ متاعك ياملهط ، يابنت اش باش يقول فمي !
الناس يحسبوها عركه بينو وبين مباركه مرت عبد القادر ، قالوا تلقاه بيك الهاني هو اللي جاب البلاء لروحو بالكلوف متاعو وهو نهار كامل يتلطى ولاهي بالماشية والجاية لو كان مشى خدم على روحو خير . حتى يقلع الحلفة والا يلم الحطب !
داقا داقا وصل بيك الهاني للدار ، هايض وكشاكشو خارجه ، يتهز ويتنفض ، اول ما حط رجلو في العتبة ، يسمع كان الطش والرش ، منانه مرتو ، قالتلو :
جيت سي الشباب !
قاللها :
ايه هاني جيت ،
وهبط صوتو شويه وقاللها :
حاجتك بيا !
قالتلو :
حاجتي بيك ؟ انا حاجتي بيك ! ياللي ما تسواش ياواطي !
بيك الهاني عرفها قارصة وعرف اللي نهارو موش باش يشوف فيه شمس ، زاد وطى صوتو ، وعطا للذل كارو وقاللها :
يامنانه تو اني عملتلك حاجة ..
قاطعتو بصوت عالي :
تعمل ! وانت توصل باش تعمل ! تعمل عود في عينك !
زاد بيك الهاني هبط صوتو وللي يادوبك يتسمع وقاللها :
يابنتي يكون منك الهدا . قللي اش ثمه ، اشبيك شعلت فيا فتيله بلا زيت !
هاضت منانه وطلع صوتها يجلجل :
انت ما تجيش في ظفر سيدي ، توصل تقللو اشبيك لقيتلي خدك ! أحمد ربي اللي لقالك خدو وما مدلكش يدو تبوسها !
بيك الهاني عرفها نتانت وغبرت عند راسو قاللها حب يوريها تعبو وجهدو في خدمة سي خوها المتوظف اللي جاي من تونس ، وهابط مالكرهبة الخضراء ، وجايب قفه فيها زوز خبزات طلياني متاع كوشه ، وباكو بشكوطو ، وسكر وتاي ، وحكه شامية الغزالة قاللها :
عجب ! هذا كفويا ! نضت مالصباح وبردعت البهيم ! وهبطت للصليب حتى الشمس مازالت ما زرقتش ! وأني نصهد لين جات الكرهبه الخضرا !
قألتلو منانه :
عندك مزية محسوب ! تخدمو بشوافر عينيك وشويه ! لبستك مالفضالي متاعو ، حكة النفه من عندو ، الكبوس اللي على راسك فاضل سيدي ، وتزيد تحل جلغتك وتقللو اشبيك لقيتلي خدك ! اش تحبو يعمل يمد شواربو باش يطعم فمك لبخر سي البليد !
حب بيك الهاني يوقف على روحو الضرب قاللها :
ياللا بع .. بع .. راني غالط ، سامحني . والمره الجايه تو نكب على يدو نبوسها والنبوسلو صرتو يرضيكش هكا ، وهاني خليتهالك وخارج !
قالتلو :
أخرج ريح السد . امش عكز واقعد من حجرة لحجرة ، وانت نهار كامل تتكولف على خلق ربي ، امش أخدم ياديني كي الرجال !
بيك الهاني ، خلاها تتكلم ، وهو لبره ، ما سمعش شطر الكلام !
عاد احنا ،، في هاك الزمان القديم ، في دشرتنا ، كنا نسلموا على بعضنا كبار وصغار نساء ورجال بالبوس ، والبوس عندنا بالفم يعني بالشفايف يعني الشفة عالشفة ..
وياويح اللي يلقي خدو وما يبوسش كيفنا الشفه عالشفة !
حاصيلو .. كان زمان !!
Aucun commentaire:
Enregistrer un commentaire