المرا تبارك الله عليها زين وعين وقد وما زالت كي خرجت من عند لستيتيسيان ممكيجه وعاملة مانيكير احمر شعشاعي وريحت البارفان تضرب تصرع والشعر مصبوغ واللبسة ماشاء الله في منتهى الذوق والأناقة . وسي عمر يتكلم مع الحريف قاللو :
والله حشمني برشه هالببغيو الملقوط وقريب يفسدلي سمعة الحانوت . مانيش عارف منين تعلم التزوفير ! تو هاذي البيعة الثالثة اللي نبيعو ويرجعلي وحتى الحرفاء ما يطالبوش باسترجاع فلوسهم ..الا هذا يجيبو ويقللي :
السماح في الفلوس الخليفة عليه !
واستاذنو ومشى يسلم عالمدام . تبارك الله مرا وسط في العقد الخامس من عمرها لكن موش ظاهر عليها وما تعطيهاش عمرها الحقاني . قاللها :
تفضل مدام . المحل محلك . نكمل مع السيد ونكون على ذمتك . نشربوك حاجة مدام ؟!
قالتلو : نون/مرسي . خوذ راحتك !.
المرا تتمشى في المحل خطوة خطوة وإذا بيها وصلت قدام الببغيو . ماكانش مالعاكسين صحيبنا قام يغنيلها :
مريضه هاي .. ما عندك سوا
جانا الخبر .. وعزمنا توه !
المرا مسكينة تبهذلت . سي عمر سمع الببغيو . قال بينو وبين روحو :
حربها هالببغيو الكلب . وباش يهرب عليا الكليونت !
وصل الحريف اللي كان واقف معاه للباب ومشى يجري للمدام قاللها :
تفضل انا على ذمتك ! بربي ما تاخذش عليه ! راهو ما متعبني كان هو ! المشكلة يامدام اللي ثمه ببغويوات نعلموهم ونوحلو فيهم ! قلت للمدرب من فضلك ما تعلمهوليش برشه ! قاللي باهي ومشى علمو حتى علم النفس على طريق اخصاءيين !
قام الببغيو يصيح :
مريضة .. قلبها موجوع ! مصدومة مسكينة !.
قالت المدام لسي عمر :
سامحني . انا نعرف هالببغيو وهو زاده يعرفني . راجلي ، قبل ما نطلقو ، كان شراه من عندك ! قعد يزن على راسي :
ياعيشة راهو ببغيو شباب ومتكلماني . ويزينلنا الصالون ! هاوكا تبدى عندنا قطوسة سياموا وببغيو مالكناري ! حاجة تهبل .!
واكيد راجلي حكالك الحكاية اللي هزتنا للطلاق !
قاللها سي عمر :
مكتوب يامدام . الحقيقة لثنين ما حقكمش ! لكن انا متاكد اللي هالببغيو الكلب تسببلكم في المشكلة . اش كان عليه لو كان سكت وستر ما ستر الله . شبينا ياخي الناس ما تغلطش . وربي غفور رحيم !
قالتلو للا عيشة :
اللي ما تعرفوش سي عمر هو انا مرا كنت متحجبة . وكنت نحضر الدروس الدينية . الله يهديه الشيخ غواني . وللى يجيني للدار يعطيني دروس في فقه الدين حتى لين وصلني لفقه النكاح .
سي عمر قاللها :
يامدام خللي كل شيء بالسترة . ارم وراك . ماو حتى هو سي الحفناوي زاده عمل البطيط . اما اش تقول .. والله لوكان ماجيتش نخاف من جمعية الرفق بالحيوان راني هالببغيو ذبحتو ورميتو للكلاب .. اما ماك تعرف .. وزيد زيادة الصانع اللي معايا هو الكاتب العام متاع الجمعية ! ايا ما عليناش . فاش تحبني نخدمك يامدام .
قالتلو :
نحب نشري هالببغيو من عندك !
قاللها :
اشنوه يامدام تحب تنتقم منو !؟
قالتلو :
لا . نحب ننتقم مالشيخ اللي فسدلي حياتي !
قاللها سي عمر :
اوه يامدام ! كان كل واحد يحب يشري باش ينتقم . الحياة تفسد وتفقد لذتها ! مالا لو كان نحكيلك اش عمل في السيد اللي كان معايا وخرج توه ! والله شيء ينطق مالجناب ! السيد كان مسؤول كبير في بانكة . وسرايقو الكل ورشاويه ينظمها من تلفون الدار . سي الببغيو حاطينو بحذا التلفون ! الراجل يتكلم مع المحامي متاعو قاللو :
اش يعنيك ! القاضي اللي باش يحكم في النازلة قريبي . وزيد جاي هو والوزير . حتى الوزير عندنا معاه نسب تو نسيبلهم حويجة ونسلكوها . اكاهو ما نطولك بحديث .. القاضي والوزير استنصبوا .. وبدى سي الببغيو يسردلهم في البردة بالباء والتاء ! ما كانوش مالعاكسين هزو رواحهم وخرجو وقلبو عليه الطاولة رصاتلو مسكين يتهز ويتحط وتطرد من خدمتو وباع دارو وطلق مرتو وهاوينك شفت حالتو المسكين تقولش عليه كلوشار . جاء يتسلف من عندي في كراء دارو . اش تحبني نعمل . حسسني بالذنب . ماو الكلو من جرت هالببغيو الكلب . راهو ما تتبلش في فمو زيوانه ! الله يسامحو هاك المدرب .. وحله وحلتها ومانيش عارف كيفاش نسلك منها ! اما ما حكيتلكش عالمرا اللي شراتو وعملت لمه لصاحباتها .. الور/لا .. الكاتاستروف بيدها ! ماو فرشهم وبدأ يقول اش قالت كل واحدة في لخرين وعينك ما تشوف الا النور . ياكران شعورات . يا حوائج مقطعة والعياطات قبب . الحاصيلو ما قصتها كان الشرطة !
راني نبهت عليه . وين تجيتي فيه بيعه . نهزو معايا للدار ونبدى نقري . ياولدي راني ماندوملكش . ياولدي هني على لسانك واعرف اش تخرج . راهي بيوت الناس أمانة والسر لازم نكتموه . يهز راسو يقللي موافق عرفي . ويمشي يعمل في خلاها ما والاها . اسكت نسيت . موش مره جاني ضابط كبير في الشرطه وقاللي :
نحب نشريه !
قلتلو :
ياولدي راهو متكلماني وينجم يضرك في مستقبلك ويمسلك قوت أولادك .
لكن الحكاية اللي عمري ما ننساها . جاني مره زعيم حزب على انو مغروم بالطقاطق . قاللي :
على ما سمعت عليه نحب نشريه ونحطو في مقر الحزب !
راني هاك الازفات اللي معايا مانيش مرتاحلهم عالأقل هالببغيو يوصللي الميساج فيسع باش نعرف الضرب منين جايني !
قلتلو :
ياحضرة ألزعيم ! نصيحه مني ليك ! راهو تنجم تدور ضرب خنيفري في مقر حزبك .. وانتوما يازعيم مازال عودكم أخضر .. حاصيلو يامدام ماقنعتو كان قريب نجبهي عليه ونعطيه انا حق الببغيو ويفك على سمايا .. والله يامدام حيرني هالببغيو والمرا تزن عليا:
ياولدي سكر عليك هالحانوت هاي رصاتلك في المشاكل !
لكن الحقيقة انا ما يقنعني بتسكير الباتيندة وغلقان المحل كان هالببغيو الزفت المثير للفتن ... والفتنة ، اعوذ بالله ، اشد مالقتل .. انت تتفكر التاريخ متاع داحس والغبرا ماو سببها كورس بين زوز فرصات ! حرب دامت سنين وسنين وسالت فيها دمايات يادمايات .. والله الواحد يخاف لهالببغيو يقيم في البلاد حوبارة !
والله يامدام حرت وحار دليلي ومانيش عارف اش نعمل فيه ! حتى كي جاتني الفكره باش نهديه لحديقة البلفدير خفت لا يعمل حرب أهلية .. هذا ببغيو لايكتم سر ولايشد لسانو .. ببغيو حاشاك متاع فتنة وتفتين !
تنهدت المدام وقالت في قلبها : تقللي ليا انا عاد ..
قال بينو وبين روحو : الله لا ينهدك ولا يبيتك وحدك ..
وكمل سي عمر بعد التنهيدة كلامو :
وتصدير هالنوع مالحيوانات يامدام يخضع لشروط إدارية معقدة وطويلة وقاسية .
حترت وحار دليلي .
المرا فدت من كلامو وتقلقت والليل قريب يطيح وقفت وقالتلو :
ايه وانا هاك الشيخ الملطوع عندي في الدار اش نعمللو ياسي عمر !؟
قاللها حب يفدلك ويخففلها وجايعها :
هاهاها.. والله فكرة . هز أهديه لمرتو الثانية ثماش ما تنتفلو هاك اللحية !
قالتلو :
ماي مرت الشيخ الثانية هي اللي فسدتلي الراجل !
قاللها سي عمر من باب التهوين عليها :
شوية فساد ما يضرش يامدام . راهو انا عندي فلسفة في الحياة خرجت بيها من تجربتي الطويلة . خلاصتها تقول : اللي الفساد كي الملح للطعام ! تكثر منو يفسد الماكلة يردها سبخة ما تتذاقش ! ولذا الاعتدال في كل شيء مسالة مهمة ! خللي انتوما ماشاء الله زيتكم في دقيقكم ! قاعدين فرد طاولة اما شنوه كل واحد يأكل من صحن جارو .. هاذيكا الحكاية وما فيها ! انا من رايي لو تتوافقو احسن ويطيح الكاف على ظلو وياناس ما كان باس .. إلى متى باش نقعدو هكا .. اما خير على عينك ياتاجر والا تقعدو كولني ناكلك .. التوافق باهي راهو .. هي الناس بيناتهم دم وتوافقو .. خللي انتوما ! علاش ياخي شنوه اللي وقع بيناتكم هو ! الله غالب انا إنسان براغماتي .. ما يلزمش زاده الواحد يشد صحيح حتى يخسر الكل .. الحياة هكا جبده ليك وجبده ليا ..
بعدما خرجت تلفت سي عمر للبغيو وقاللو زعمه زعمه يتلكش عليه :
ريت جرايرك وجرائر لسانك اللي ما يهنيكش ماو سيدي ! هاي رصاتلي نبرر في الفساد ! كللي البلاد ناقصه فساد !وقتاش ربي ينوب عليا ببيعه فيك خليني نرتاح من منظرك لحرف ! راك بديت تجيب في الشبهات للمحل متاعي !
قال الببغيو وهو يضحك لسي عمر :
هاهاها .. والله وحدك ياعرفي في التكتيك والبوليتيك ! زايد معاك .. معلم ! المرا شقلبتلها كيانها ..
Aucun commentaire:
Enregistrer un commentaire