( راقصة عدم الانحياز .. ( الجزء الخامس

راقصة عدم الانحياز  ** الجزء الخامس  **

-------------------------------------

السيد  ، اللي عواطف حطت عليه عينيها ، راجل ما شاء الله عليه ، مزيان ، طويل ، عريض ، قمحي ، قمح دريد ، زريعة بلادنا ، معجون من طين برورنا البعيدة ، استاذ رياضة بدنية ، لاهي برويحتو ، ما عندوش الزايد والناقص ، من دشرة مالدشر المرمية بين الجبال ، في بر تونس المزيانة ، تعرفت عليه ، كي مشات مع صاحبتها باش تقابلو على خاطر بنتها.، بنت صاحبتها ، عندها مشكلة صحية في التنفس ، وباعتبارها تتابع في علاج معين ، عاد حبت تحط الاستاذ البرني في الصورة ،

عواطف ، أول ما خزرت لهالبنيان الرياضي ، المتناسق والمتكامل ، وجات عينيها في عينيه ، قالت بينها بين نفسها  :

هذا هو !

نحنا في شهر أفريل  من عام 2007 ، وسي البرني ضاربلها شورت وسبادري وشابو ، ومريول رياضي سينيي نصف يد ، بحيث خللى تفاصيل صدرو ، واكتافو ، وذراعاتو ، يوريوها جسد في منتهى التناسق والقوة والجمال ، قالت بينها بين روحها  :

ما شاء الله ، تقولش عليه منحوت نحتان ، كاينو تمثال رائع من تماثيل الاغريق والرومان ، سبحان اللي نفخ في صورتو ..

كي كملت صاحبتها حديثها مع الاستاذ البرني ، استأذنت هي ، وسألتو  :

بربي ممكن نسألك سي البرني ؟

قاللها :

تفضل مدام ..

قالتلو :

تعرفش صالة رياضة باهية ، فيها المستلزمات الرياضية الضرورية ، على خاطر مانيش حاسة براحة في الصالة اللي نترانا فيها توه ..

خزر في عينيها وقاللها  :

موجود برشه ، قللي فين تسكن ، بالكش ننجم نعاونك تلقاش صالة قريبة للسكنى متاعك .

كي عرف فين تسكن ، قاللها :

باهي برشه ، الصالة اللي انا نراني فيها ، صالة هاي ، ما يجيها كان الناس اللي هوما ، نساء ورجال ، وزيد الطاق الفوقاني مولاتو استيتسيان معروفة ، اسمها مدام بخته ، عاملتو لكل ما يهم النساء  : تجميل ، وتمسيد ، وحمام بخار ، وراهي ما تقبلش اللي يجي ، كليوناتها مختارتهم بالكعبة ..

قالتلو :

وي ، نسمع بيها مدام بخته ، هذا علاش نلوج حتى انا . ممكن نعرف الاوقات اللي انت تنجم تكون متفاضي فيها ، خليني نجيك و تقابلني بمدام بخته وبصاحب الصالة  ..

قاللها :

ممكن ياسر ، علاش لا .

وكان العمل هكاكا ، نهار الجمعة لربعة متاع العشية ، كان البرني يستنى في عواطف في البلاصة اللي تواعدوا فيها ، وصلت . براكات الكرهبة . هبطت ، مشات في اتجاهو خطوات ، تتبختر في اونصومبل عاطي عالبيستاش ، تحت الفيستة سورية حرير مخططه بألوان قوس قزح ، فوقها فولارة حرير وردي فاتح ، عملتها على رقبتها ، وماكياج خفيف ، زاد في ابراز جمال تفاصيل وجهها ، الشفايف ، والخشم ، والعينين ، عينيها واسعين وشهل ، تظللهم حواجب مقرونين ، وتعمدت باش تخللي بزازلها باينة بارزه ، كاينها تقول لسي البرني ، جايتك باش  نهزمك يا متاع الرياضة !

بدنها ما شاء الله كامل ، قال البراني بينو وبين نفسو وهو باهت ومجذوب كاينو يسبح بهالاية الجميلة . مشا البرني ، تضرب جاء يدور ، خذاتو بهتة ، وقعد حالل فمو ..

عواطف ، كي قربتلو ، مدت يدها باش تصافحو ، خزرتلو وهي تمسي عليه ، وعرفت اللي البرني ذاب وطاح ما في عينو بله ، عاد باش تنقذو مالموقف اللي هو فيه قالتلو  :

ديزولي سي البرني ، خليتك واقف تستنى ، سامحني برشه !

قاللها البراني بصوت ذابل خارج من جواجيه وهو يبلعو في ريقو بلعان  :

لا ابدا بالعكس ،، بالعكس يا مدام ،  انت جيت في الموعد ، ويعطيك الصحة !

لوحت عواطف عليه عينبها ، في خزرة حبتها تكون خزرة طويلة شوية ، وسحبت يدها من يدو بلطف وتبسمتلو ، تبسمت لين سي البرني ، المسكين ، ما لقى بيها وين ، ضاع وتبهذل وكيانو تشقلب وتهز .

بينها بين نفسها وهي تخزرلو ، تضربت فيه  ، عجبها هالسكادرة الملاين والمفعم بالرجولة ، قالت لروحها :

واو .. بصراحة هاو الراجل اللي يملأ العين ويكيف ويشهي ، 

ما احلاه البرني ، حتى اسمو حلو ، وطير البرني ، في الطيور ، عندو خصال في باهية في الطيور  .

وما نضنش قعدت في عواطف ، حتى هيا ، منطقة في قلبها وفي جغرافيا حواسها ، ما زالت قادرة باش تقاوم هالغازي الجبار اللي طل في سماها ولقى بيبانها مشرعة تستنى فيه باش قلاعو في مراسيها ..

ركب بحذاها ، شم ريحة العطر ، تفوح منها ، عطر مغري ومثير وجذاب ، يعملوه السيدات الجميلات الذكيات في حالات الغزو ، وشاف زنودها ، ملى عينيه من هالزنود اللي مالقالهمش حتى كلمة باش يوصف تناسقهم ، حاضنين بزازل مالقاوش فرصو باش يميلو لا يمين ولا يسار ، طبعا ، هذا بعدما تعمدت عواطف ، تنحي الفيستة وترميها عالكرسي التالاني ، بحيت قعدت في السورية المخططة نص يد ، زاد سرق نظرة وشاف هاك البزولتين كاينهم يبعثولو في نداء استغاثة ، بينو بين روحو ، استنجد بامو قاللها :

ياميمتي اجريلي . اجري لوليدك ، راهي مدام عواطف مشاتو طروف ،

وتبسم البرني كايني يعتذر على هالموقف  ..

بزازلها ، من تحت السورية ، هوما زاده بداو يحضروا في الساحة قدام عينيه ، اللي ما عادش تنجم تضبط إيقاع الجولة على جسد رفيقتو في الكرهبة ، قالتلو عواطف وهي الديماري في الكرهبة  :

سي البرني ، على فكرة ، انا مانيش مدام ، مازال المكتوب

ما نادانيش ..

وهو ماشي للغريق ، قاللها بصوت رهيف، ضعيف ، كاينو يستنجد بيها باش تمنعو  :

ربي ينوبلك بولد الحلال ، ما شاء الله عليك وعيني ما تضرك تستحق كل خير والف من يتمناك ..

البرني طاح كيما طاحت هي ، لثنين جاو ما في عينيهم بلله !

-----------------------------------------------

إلى الجزء السادس من ** راقصة عدم الانحياز  **