نساء ورجال في بحر الدنيا 2/1

 هزت يدها ، التاكسي لولانية وقفت . هبط البلار  . قاللها :

وين ماشية ؟ 

قالتلو :

لحي درا شنوه 

التاكسي ما سمعش حتى اسم الحي قاللها :  

ماكش في ثنيتي . وانا وقت البوسطه متاعي وفا . والصانع يستنى فيا . 

ديمارا وخرج من غير ما يكمل يسمعها .   

الثانية كيف كيف ، نقص ، خزر وتعدى ..

 الثالثة .. الرابعة .. شي ..

قعدت واقفة تحت الشجرة في الظل ، مقابلة المنقالة ، في شارع بورقيبة ! 

قالت بينها بين روحها   :

ياريتني هبطت كرهيتي . ولا هالتبهذيله هاذي .. وانا ما زلت نعاودها هالعملة !

نفخت مالقلق وكملت  :

مطولو شهر مارس ، ومرزن ملايكتو . لا تفهمو سخون ، لا تفهمو بارد !

ونفخت مره اخرى . افففف . خزرت للوقت . ساعة غير ربع وهي تستنى . ياريتني ما هبطت للمارشي سنترال في الميترو . حتى كان لقيت حوت باهي . شبيه الحوات متاعنا ، حوتو باهي وفرشك . مللى عمله عملتها في روحي . هكاكه وضرب التلفون .هزت تلقاه هو . قالت :

 هه سي الشباب طالبني . ما لقى يطلبني كان في هالوقت لحرف . الصبر وبره . تو حلال ما نهزش عليه ونخلي التلفون ينوقس لين يسكت . قداش من مره نقللو اطلبني في الليل . لخره نبدا على راحتي . ونشوفو بعضنا عالسكايب !

هكاكا وتشوف في تاكسي اوبال نص لباس ، هزت يدها ، وقفلها ، حل الباب قاللها :

تفضل !

ركبت ، سكرت الباب  ، قالت للتاكسيست :

 بار الله فيك ، نهارك زين ، وربي يعينك . 

حلت التلفون قالتلو :

 عالسلامة . سامحني  يارياض . انا في التاكسي ، ما نجمش نتكلم على راحتي . نتكلمو كي العادة بالسكايب في الليل . وعلقت عليه ، 

تلفتت لمولى التاكسي قالتلو :

قريب الساعة وانا واقفه نصهد . حتى تاكسي ما حب ياقفلي قال شنوه قال مانيش في ثنيتهم  .

التاكسيست . شيباني وضامر.، ولسانو يغزل الحرير ، خزرلها في الروتروفيزور ، حلات في عينو  ، قاللها من باب الفدلكة :

عيب عليهم ! لازمنا ناقفو لتونس ! كان ما ناقفولهاش نحنا اشكون باش ياقفلها ياللا .. هاهاها !

ضحكت ، ولوحتلو  خزره ، تلقاه شيباني نظيف ، والتاكسي نظيفة مرشوشة بريحة الخزامى . زادت تبسمتلو كي شافتو راشق عينيه عليها في الروتروفيزور .. هو  روتروفيزور برك .. السيد عامل زوز روتروفيزارات  قالتلو ، تماري فيه في الفدلكة متاعو :

ياسر عليا .. تونس فرد مره . هاهاها تي انا حتى زنقه ما جبتش ! 

ومن بعد زادت لوحتلو كومبليمان اخر : 

 والله تسامحني نحب نشكرك ، عالنظافة يا عمي اش سماك ربي ؟ !

قاللها : 

لا شكر على واجب . هكا تربينا . سماني ربي خميس . اسم انتيكا مالاسامي اللي ما تمشيش مع الموضة . ما قعد في توكابر اسمو خميس كان انا ، قريب كيف نمشي نعمل طله عالعايلة في البلاد ، يعملولي استقبال بالطبال والزكرة ، باعتباري تراث يتمشى فوق أديم هالدنيا .. هه .هه ..

وانت يامزيانه اش سماك ربي !؟

ضحكت من اعماقها . خزرت لعينيه في الروتروفيزور ، عينيها لعبت مع عينيه ، بينها بين نفسها قالت  :

هالشيباني قداش ضامر ، وحلو ، ومتهندم ، كرافات وكسوه معتبرة .

وهي تتكلم مع روحها ، التاكسيستي حطلها كاسات بوشناق والصادق ثريا :

كي يضيق بيك الدهر يامزيانه 

 وتدور وتدور ما تلقاش غيري انا 

بربشتلها حاجه هالغناية ، وهي مرا صغيرة . ما زالت عروسه . تسعة شهر مللي عرست . الحبيب عرس بيها ، قعد معاها خمسطاشنيوم ، ورجع للخليج ، قال شنوه قال  باش يكمل يخلص البرطمان ، ويلم شوية فلوس ، ويجيب كرهبه اف/سي/ار ويروح ..

بره عاد ايجاني ونجيك باش يعمل هذا الكل ، ومخليني لهنا ملوحة للشر والعطش .. يعنبو الفلوس ، والديار ، والكراهب قدام رقده في الليل وانا محضونه ، وساقي مرميه عليه ، وبزازلي مرمية على صدرو ..

وسرحت بعيد وعينيها ظلامت قاللها سي خميس :

توحد الله .. اشبيك سرحت . اشنوه الغناية ما عجبتكش؟ كان ما عجبتكش نسكر .. والا نبدلك ام كلثوم .. قالتلو  :

 لا .. هه .. بالعكس باهيه برشه .. اشكون موش الدهر ضياق بيه ياعم خميس ، خللي عزاها سكات وبره ..

تنهدت من عروش قلبها وقالتلو :

حتى انا اسمي انتيكا كي اسمك .. اسمي خديجة .

قلنا عمك خميس تاكسي ستي ، وطايح مالسلوم  ، ويلقطها وهي طايره ، خزرلها وقال : 

اللطف عليك من ضيق الدهر . فضفض لعمك خميس . ما تخللي شيء في قلبك . 

قالتلو : 

لو كان نفضفض تو توفى الكورسه  وحكايتي ما توفاش !

سي خميس ، قلبو بدأ يدق مالفرحة ، قال بينو وبين روحو : مللى زهر عندي ،  حتى هيا المدام تدعيلي كي نجي خارج تقللي :

بره يراك وين تقبل تربح .. ودعاها كل نهار خميس مجربو انا ..

خطف نفس وحط عينيه في عينيها وقاللها : 

يعنبو هالكورسه . هاني باش نسكر الكونتور . غير ما تخللي شيء في قلبك . ما تقولش هذا تاكسيستي . ما تحقرش النازلة  ، عمك خميس عامل عامين جامعة . قريت في كلية منوبة لغة اسبانية . وصدفة  ، نلقى خدمه في تعاضدية ، فلوسها ميش بطاله ، قست منا ، قست منا ، نلقى الحساب ما يواتيش لو كان نكمل القرايه . اكاهو . من حينك قفزت بروحي . خدمت ، وعرست ، وجبت لولاد ، قراو ، نجحوا ، عرسوا ، جابوا لولاد ، وهاوكا توه كل واحد شادد دارو . قعد عمك خميس راسو راس الحاجة فضيلة . صحه ليها عملت حجه وعمره ، والسنا وين خرجت في تقاعد نسبي . اما انا خرجت عندي اكثر من عشره سنين . فلست التعاضدية عام ألفين وسبعة ، عطاونا هبوطنا  ، وخذينا هاك التقاعد المبكر . عاد قلت تو انا باش نقعد قاعد . انا مانحبش القعاد . نحب الحركة والنشاط وما نحبش البركه . وليت خذيت بهاك الفليسات متاع الهبوط هالكريهبة وعملتها تاكسي . وهانا عايشين . نخدم بالكيف . أربعة خمسة سويعات ونعطيها للصانع . جاب ربي الصانع جا ولد اختي . يخدم عليها في البوسطه متاع العشية . ريت قصة حياتي ياخدوجه قداش بسيطه . تو انا وفضيلة راسي رأسها في الدار . ومللي خذات التقاعد ، طلعتلها برشه امراض . وبدأت عاد تشكي وتتشكى. ، اش نعملولها . هاذي عشيرة عمري . وانا إنسان حنين . ما نطيقش . الله غالب . هاذاكا علاش قلتلك فضفض ويعنبو الكورسات والفلوس . هاو حالنا محسوب فرد حال ! 

بعدما حكاتلو حكايتها . قاللها :  

يعنبو الفلوس . عروسه كيفك ماشاء الله ياقوته . يخليك هكا وحدانية . هي شجرة الورد كي ما ترعاهاش وما تسقيهاش عودها ييبس وتذبال ، معقول هذا !  ورده كيفك انت تقعد للجوع والعطش  وللشموس والبرد ولرياح . وحدك في هالصحرا المعبية بالحنوشه . لا . لا . ما حقوش . عيب عليه . ايه وتو اش عامله ياخدوجه في امورك . حدثني . فرغلي قلبك المليان . تحدث باش ترتاح . 

كيف وصلو قدام العماره . عماره مضخمه . قاللها : 

ااااا . هاذي بلاصه قمقومه . شكون وشكون يسكن هنا .

قالتلو :

لسم العالي والمربط الخالي . يامزين من بره اش حالك من داخل . 

وجبدت باش تخلصو قاللها : 

والله ما ناخو عليك حتى فرنك . مزالش عاد . تي انت في ثنيتي وانا مروح بيك والا بلاش . الفايده في الوجوه السمحه و الباهية كي هالوجيه . الفلوس تمشي وتجي .

قالتلو :

مالا والله يميني على يمينك الا ما تطلع بحذايا للبرطمان . لخره تشرب حاجه . براكي الكرهبة في الباركينغ المقابل . واضرب الناقوس في الطابلو على النومرو اثنين اثنين تو نحلك الباب . تطلع في لاسنسار . تهبط في الدوزيام إيطاج . البرطمان اللي عاليمين . ساهل برشه . تو تلقى الباب مكتوب عليه مسيو اي مدام ...... نخليلك الباب دوب اللي مشوك . حل وادخل . على كل حال تلقاني نستنى فيك . 

عمك خميس فرك يديه مالفرحة . قال بينو وبين روحو . الحمد لله ديما في جرتي دعا الخير . حتى الطيحات اللي تطيح فيهم  ماشاء الله . وقعد يخزرلها وهي ماشية بالرنه . قال تبارك الله على هالقد وهالزين و هالمشيه  بالفيانكا وهالتبختيره وهالدلول . يرحمك ياميمتي حتى انت كنت ديما تدعيلي بالخير وتقللي بره وليدي ربي يجيب وجيهك للضو  يجعلها ضاويه وراك وقدامك  . اش خير من هالضوء . قمر أربعطاعش . ماهياش فيلقار . الماكياج متاعها خفيف فيه ذوق . يرحم الام اللي جابت .. نهارنا فل وورد وياسمين .. جبد دبيبزت البارفان (بوص ) مالبواط ا/غون عمل تفرشيكه على رقبتو ضرب ضريبات على حوايجو . سكر الكرهبة بعدما عطاها فرصه باش توصل لبرطمانها . حل المال . عندو  نصيف ماغون تعدى شراه مالماغزان مع العشرة متاع الصباح . لفو مليح وحطو في صاك جلد صغيره . سكر المال . وطلع يلقى الباب مشوك دوبلاش . حل يلقاها بحذا الباب . سكرو وراه . وجبدها ليه بالشويه . طاوعتو . باسها من شفايفها وقاللها : 

شنوه هالعسل ياخدوجه . 

ضحكت وقالتلو وهيا تمد في شفايفها :

زيد ذوق منو يا خموس .

باسها ومشى لسانو على رقبتها ومن بعد قاللها وهو يضحك :

مااحلاها خموس خارجة من فمك شهد يقطر . 

 ومدلها الصاك قاللها : 

شوف هذا نصيف ماغون . خميس متعود مع الفطور ديما نعمل نصيف . الواحد اش باش يهز مالدنيا غير كويس و.......

ضحكت بدلال وقالتلو :

ااااا.. انا راني ما نشربش اما ساعات كي يبدأ ثمه جو باهي نعمل كويس ..

 سكتت ومن بعد ضحكت بدلال وقالتلو :

كي باش تهزو اش باش تخليلي ..

ضحك ضحكة راجل عارف اش ثمه في جواجيها وقاللها : بوزينك ماحلاك وما بنك كلمتك حاضره بالوقت .

يلقاو رواحهم في الصالون قعدتو وقالتلو :

خوذ راحتك خموس . نعملك عصير والا تاي والا قهوه ؟ 

تبسملها وقاللها : 

تو وقت فطور . ما نحبش نفسد فطوري .

قالتلو : 

عندك الحق . مالا خوذ  راحتك . تحب تعمل دوش وتتفرشك ايجا نوريك بيت البانو . 

ومشات جابتلو كاب دو/بأن ومنشفه وشلاكه ، في قلبو  خموس قال :

 ايه ياخموس . هذا النهار اللي قالتلك عليه التكازه ياخموس يامشعشع ياباهي . يراك ما تموتش . 

نوقس تاليفونو . عرفها فضيلة مرتو . حل التلفون سمعها وقاللها :

لا . افطر على روحك انت ولولاد  ياحاجة . ما تستنانيش . برشه خدمه . تو نأكل حويجة خفيفة ومن بعد نصللي العصر ونروح . ايا بالشفاء ليك . وسلملي عالاولاد . صحه ليك هاك مونسه بيهم .

تسمع فيه بعدما علق التلفون . حطت صدرها على ضهرو ومشات صوابعها على رقبتو وباستو من شحمة وذنو وقالتلو :

خموس . عزيزي . عندك برشه خدمه . شوف وشوف كان تكمل قبل المغرب ادخل دوش الوقت اللي نحضر فيه الفطور وندوش من روائح الحوت والمقلي ومن بعد نعملو جو !

حطها في حضنو وضمها ووشوشلها في وذنها وقاللها :

 انشاء الله الخدمه معاك ما تكملش العمر بكلو . اش عندنا ورانا ياخدوجه !

( طولت . وطولت برشه . وسعو بالكم عليا .. بقية الحكاية تكمل بحول الله في الجزء الثاني )

------------------------------------------------

(  **  ) تدوينة نشرت بتاريخ 7 مارس 2018