اوراق الخريف 3/3 ( الحلقة الثانية من 3/3 ) ( ** )
__________________
لبست لبستي الرياضية ، السبادري والسرفاتمان ، حطيت الكاسكات على راسي ، هبطت للباركينغ ، ركبت في الكرهبة ، خدمت الموتور ، وخرجت ، تعديت عالسوبارات ، صبحت ، صبح عليا سالم وقاللي :
اشنوه مدام ، كي العادة . شويه فوتينغ ، والله صحة ليك !
جبدت دبوه ماء صغيرة مديتلو عشره آلاف قاللي :
مدام ، من بعد كي تقضي خلصني ، ما عنديش صرف .
رجعت العشره آلاف لسطوشي ، خذيت دبوزة الماء ، قلتلو :
ايا ربي يعينك .
خرجت . ركبت في الكرهبة وديماريت ، نتلامح فيه شادد الماده وماشي قدامي ، زعمه هو ! موش هو ! زعمه نرجع لسالم نسألو عليه ! والا فك عليا ! عاد اشبيه سؤال بريء ! اشنوه اللي فيه عيب ! اوه حتى انا زاده ! رانا عايشين في تونس ! الحومة مازالت صغيره ، اش خللى سالم متاع السوبارات يعرفنا بالواحد ! فك عليا اش مرجعني نسال في سالم ! هاني تو نعمل رالنتي ونثبت ! كان طلع هو تو نصبح عليه ! ديماريت ، كي قربتلو ، ثبتت فيه طلع هو ! هو ! هو !
قريب نزغرط ! فرحت ! قلبي تهز وتحط ! قريب نقوم نشطح مالفرحة ! ااااه مللى هبله .. الفولون في يديا ! ايا الحمد لله ! ما شلقتش على روحي وسالت سالم ! فتو شويه . وقفت الكرهبة ! قعدت نخزر في الرتروفيزور ! خلط هو وفاتني من غير ما يتلفت ! زمرت عليه التزميره لولى ، والثانية ، ثمه خدام متعدي قاللو :
سي محمد يضهرلي المدام تزمرلك .
تلفت ! رجع خطوتين ! طبس راسو ثبت فيا ! كلاني بعينيه ! وكلاتني الحشمة ! هاذي قالتلهم اسكتوا عاد ! مرا تبزنس في راجل كيما يقولوا فروخ توه ! وعلاش لا ! اشنوه اللي فيها عيب كي مرا تتضرب في راجل ! السن ! ياخي اللي في عمري وعمرو ماتت قلوبنا ! ما عادش عندنا احاسيس ! موش من حقنا باش نحبو ونتحبو مادمنا عايشين ! وعلاش كي نكبروا نتخمدو ونخرجو رواحنا من دورة الحياة باش نقعدو فرايجية في تياترو ، الناس اللي معانا واللي قدامنا وحدهم يتحركو فيه ! من شيرتي كنت ديما رافضه هالسلبية ! هاذاكا علاش عبيت اوقاتي بالنشاط المفيد ، المطالعة الرياضة ما نفلتش حتى مناسبة والا حفلة ! الا الفراغ اللي في وجداني مالقيتش كيفاش نعبيه ! نخزر .. نخزر .. شيء ، ما واتانيش الراجل اللي يملا العين ! ماو زاده الواحده والا الواحد منا ،
ما يصومش دهر ، ومن بعد يفطر على جراده ! سبحان الله . هنا المسالة توللي مسالة كيوف ! انا هكا . نحب نشري الغلة المزيانة والحوته اللي تشهيني باش ناكلها ! التملغيص ما نحبوش !
اوه .. صوتو خذاني من لحظة التوهان ! رجعني من مالبهته والشرود ! مد يدو ، مديت يدي تصافحنا ! حسيت برعشة خذات بدني الكل ! تبهذلت وتدرولت . ضعت مالقيتش روحي ! نازلة عالفران وحاطه بروميار ما نعرفش كيفاش ساقي تهزت من عالاكسيليراتور ! وقف الموتور . تخضت الكرهبة ويدي في يدو ! نسمع في صوتو داخل كي النغمة !
قاللي ساعد روحك ! رجع بوان مور واجبد الف ان ا/مان !
طبقت نصايحو من غير ما نشعر ! وحليتلو الباب من غير ما نشعر ! ونلقاه بجنبي عالكرسي ما نعرفش كيفاش ! وما نعرفش كيفاش نحيت المرايات من على عينيا ! ومن غير ما نشعر حطيت عينيا في عينيه وقلتلو بعينيا :
نفركس عليك عندي مده طويله .. بطيت عليا برشه !
خزرلي بعينيه الزرق خزره فيها جواب واحد والف سؤال لخصتهم عينيه الزرق ، الهازه الحلم والخيال والرقة والعاطفة الفايرة في كلمات كاينهم ابيات شعر :
سامحني ! انا اللي كنت نلوج عليك ! ركبت البحورات ! وطرت في السماوات ! كلاتني الايام والسنين . تغربت وشرقت وغربت ! ريقي شاح وانا نلوج عليك يااحلى واجمل مرا شافتها عينيا ، وحبها قلبي وروحي ووجداني ! انا اللي قريب نصيح :
وينك يا عزيزتي ! اجريلي راني ما لقيت بيها وين !
شنيه هالدخله ! فيق ! الراجل عندك ! بحذاك عالكرسي ! بجنبك في الكرهبة ! عاودت نحيت المرايات الكحلة من على عينيا ! عاودت خزرتلو . شفت في عينيه فرحة ، قاللي:
نهارك زين يامدام ، سامحني والله ماشفتك ، بارك الله فيك اللي وقفت .. يعطيك الصحه .
ريقي نشف .. قلتلو :
نهارك طيب . وين ماشي نشيعك معايا ؟
قاللي :
ما عندي وين ماشي ، كل صباح نخرج نتمشى ، نلف الحومة وندور عالجنينة ثلاثة والا اربعه مرات ، معتبر المسالة كايني مسلك صحي ، وانا من اصلي نحب المشي ، من بعد نروح للدار نشد كتيب بين يديا ، في نفس الوقت اللي نكون حطيت فطوري عالنار ! وضحك وهو يكمل :
هاذاكا حال العازب اللي كيفي .. لازم نقدملك روحي عالاقل من باب اللياقة ، انا اسمي عبد الواحد البكري .. جارك مؤقتا .. زمقري في بر الدانمارك ، كيما ولاو يسميونا !
ما خليتش الفرصة تفوت :
قلتلو نتشرفو بيك . علاش انشاء الله تكون جار دائم .. وان شاء الله الزمقرية الكل كيفك ، أخلاق وسلوك وذوق وثقافة سي عبد الواحد !
بيني بين روحي قلت :
ااااا .. هذا كلام يشبه للغزل .
عاودت قلت :
عاد شبيه ! بين عينينا ماي مشات آلاف الكلمات بكلها غزل .
قدمتلو انا روحي ومن بعد قلتلو :
الحقيقة ما نحبش كلمة أرملة ، ونحنا التوانسة ، نستعملو كلمة هجالة ، حتى هي كلمة رزينة وبليدة وركيكة ،
وتبسمتلو وكملت :
عاد ماذا بيك لو كان تلقى كلمة أخرى أخف تعوضها يكون احسن !
خزرلي خزره فيها برشه حنان ، وبرشه حب وتبسم ! تبسم تبسيمه وراتني فم ، فيه سنين متناسقة ، شفايفو حمر ، مبسمو حلو برشه .. يشره ! اوووووه حتى انا اشبيني وليت هكا ، تقولش عليا فرخه مالفروخ متاع توه . وفروخ توه قداش يعجبوني . واضحين . مباشرين . يمشيو للموضوع طول . ساعات يبالغوا . لكن .. فقت على صوتو وهو يقللي :
عندي !
اه ..
عندي .. عندي الكلمه اللي تفرحك وتفرحني وتزهيك وتزهيني .. انت الورده .. والفله .. والياسمينه .. و..
خرج صوتي كاينو غناية ونغمه رايضه ..
اااااه .. مااحلى كلامك .. ماذا بيا نقعد نسمع فيه ..
ومن بعد قلتلو :
تحب تتمشى معايا في المسلك الصحي متاع المنزه
قاللي :
ونطير ونجح معاك في مسالك الدنيا والحياة لو ترضى وتحب يا عزيزتي !
عزيزتي مره وحده !
دخل للموضوع فيسع !
شمعناها لو كان ترضى !
شمعناها في مسالك الدنيا والحياة !
قداش ذوقو باهي وكلامو حلو ينعوش ويفرعس الاشواق الراكده عندها سنين .. يرد الروح !
اوه ..تفكرت نسيبي ، راجل بنتي ، وتخيلتو وهو كايني يوخر خويا ويحط يدو على راسي باعتبارو ، كيما يقول هو ، ولي امري ! وهزتني ضحكة مليانة بالبهجة والفرحة والسعادة والأمل !
اي نعم بالأمل !
خزرتلو كي تبسم ! وشفت في عينيه فرحه وهو يسألني قاللي :
اش يضحك فيك .. ضحكني خليني نضحك معاك !
قلتلو وانا نبدل بروميار وانديماري الكرهبة :
خليك متفكر السؤال .. باش تعرف جوابو في وقت آخر !
( سامحوني طولت عليكم ..ان شاء ننجمو نكملو آخر حلقة في الحكاية الكل في أقرب فرصة .. مع التحية )
------------------------------------------
( ** ) نشرت في 3 جوان 2018
Aucun commentaire:
Enregistrer un commentaire