قالتلي :
عندك ستراس ..
قلتلها :
منين يجيني الستراس وانا لا نتفرج في تلفزة لا نقرا جرايد لا نسمع راديونات ..
قالتلي :
متزوج ؟
قمت نضحك .. نضحك .. نضحك ..
ضحكت حتى هيا معايا وقالتلي :
ياخي سامحني سألتك سؤال يضحك ؟
وانا مازلت نضحك قلتلها :
أسكت جاب ربي ما سمعتكش المرا في الصالون والا راهي كلات بعضها ..
رجعت الطبيبة تضحك وقالتلي :
ياخي المدام صعيبه لها الدرجة ؟
تفجعت أنا من سؤالها وقلتلها :
آآ .. توه راك بديت تدخل للغريق .. من فضلك ما تقولنيش كلام ما قلتوش ..
قالتلي :
باهي ياسيدي أنا اللي قلت . تقوم برياضة المشي ؟
قلتلها :
نمشي برشه .
قالتلي عندك حاجة شاغلتلك بالك ؟
قلتلها :
لا
قالتلي عندك شكون شاغلك بالك :
قلتلها :
بالطبع
قالتلي :
أشكون مثلا ؟
قلتلها :
الناس الكل .
قالتلي :
حد معين يهمك أمرو . ماو تعرف التخمام زادة يعمل الستراس .
قلتلها :
لا . موش لها الدرجة . أنا راجل مرتاح . عندي مشروع صغير . ندور بيه في الزيرو . للحركة باش ما نبركش . وما نفقدش صلتي بالحياة العملية .
قالتلي :
عجب مالا منين جاك هالستراس ؟
قلتلها :
يادكتورة ، أنا راني جيتك على مشكلة قلبي . أشبيه عمال وهو يعمللي في المشاكل ، وانا لا بيني بينو لا حرثة ولا ورثة .
الدكتورة قامت كيخ كيخ بالضحك ها هاهاها .. هكاكا ودخلت السكرتيرة تلقاها في حالة قريب تغص مالضحك .. مدتلها كاس ماء .. شربت وآرتاحت .. ومن بعد خزرتلي وقالتلي :
أول مره يجيني باسيون يضحكني وما يخلنيش نخدم كوركتومان ..
قلتلها :
آش نعملو مالا ؟ نبطلو ما نجيوكش ؟
قالتلي:
نون .. نون .. با دي تو .. مرحبا بيك .. أما ماذا بيك تجاوبني ما نغير ما تضحكني ..
قلتلها :
في الحالة هاذي يلزمني كيف ندخل لسيادتك نبدا نهبطهم فيهم حيار ونشهق ونبكي باش سيادتك تخدم خدمتك كوركتمون ؟
رجعتلها نوبة الضحك ..
دخلت المرا .. تلقاها في حالة حليلة مدتلها كاس ماء .. خزرتلي وقالتلها :
والله عارفتو .. البلاصة اللي يمشيلها يعمل فيها حوباره .. كانك ناويه باش تضيع وقتك زيد أسألو ..
قالتلها الطبية :
والله صحة ليك يامدام .. س .. سامبا المسيو متاعك ..
قالتلها المرا :
صحة ليكم أنتوما بنيتي .. السامباتي تفيض عليه مع البراينية ..
خليناها تضحك .. وخرجنا لا تعالجنا . لا خذينا دوا . لا عطينا فلوس .
( حكاية للفدلكة .. فدلكة مع الصايمين )
Aucun commentaire:
Enregistrer un commentaire