رسالة الغفران.. سرقة موصوفة لافكار ابي العلاء ( الباي اللي قدم تسليمو )

قعدت في بلاصة مروحة ..

جبدت الزمان والستيلو ، قلت بيني بين روحي زعمة بشكون بش نبدى ؟

انا مازلت نخمم ، هكاكا والسيد متعدي قدامي واحد موهر ، لابس لبسة متهممة ، وعلى صدرو بارشة نواشن صف تلصف لصفان ، ظاهر اللي نواشن مصنوعة  مالنحاس ، خزرلي ، خزرتلو ، حياني بهزان راسو ، ما آهتميتش بيه ، مشى خطوتين ، ومن بعد رجعلي ، وقاللي : 

اشنية قلة الحياء متاعك ، باقي متجنقش ، تو ما حشمتش ، وقمت باش تسلم على سيدك ، لو كان جات الدنيا دنيا ، راك هبطت على ركايبك وبستلي يدي .

تنبزت من كلامو وقلتلو : 

من فضلك .. حدك حد المسقي . أنا ما جيتش باش نطيح قدري لهنا . وبعد هذا ودونو  ، ياخي سيادتك ماكش عارف اللي أنت ماكش في الدنيا ، 

قاللي :

 صحيح . ساعات تاخذني غفوة تهزني لهاك الدنيا . سامحني ياسيد .

قلتلو : 

السماح دنيا وآخرة . دنيا على خاطر لا ريتك لا نعرفك لا تعرفني . وآخرة هاك غلطت وطلبت السماح .. أما بربي نحب نسألك ، أش كنت تعمل في الدنيا ؟

قاللي : 

تحب تعرف . نقللك ، أنا كنت باي عليكم . أما ما كملتش . قدمت آستقالتي . وشديت قصري في منوبة ، لقيتكم جماعة مهفات ما ينجم يحكم فيكم كان اللي خلقكم . بالخص هاك الزنوس المايلة اللي كانوا يسيروا في البلاد .. أعوذ بالله .. أعوذ بالله .. يخطفو سنين الكلب وهو ينبح .. والله لوكان نرجع الا ما نعمللهم أجنة متاع تتبع ، وندك جد أصلهم الكل في الحبس .. أما خسارة .. لتو ضميري يأنب فيا اللي ما عملتش هكا قبل ما نجي لهوني ..خسارة .. هاك عرفت سيدي أش كنت نعمل .. 

قلتلو :

عجب  . باي فرد مرة . ومستقيل . حتى هاذي غريبة . وشبيك آستقلت . أشبيك ما آستنيتش حتى لين يقتلوك بالسم والا بالسيف ، ماكم كنتو ديما بين بعضكم كولني ناكلك ، ودماياتكم شرتلة ، والا ، على الأقل ، ستنيت حتى يحضر أجلك . هكاكا ، تسلم فيها هناني بناني . وعلاش سلمت ، تنجمش تقللي ؟

قاللي : 

آآآآآ هاك جيت للصواب . باش تنجح في المهمة متاعك .. أي نعم باش تنجح .. على خاطر تعرف تسأل .. صحيت .. لو كان جينا غادي وقعدت نحكم ، نعطيك نيشان الأفتخار ، وكسوة معتبرة ونرجعك لدشرتكم ، بمحلة متاع عسكر الباي ، باش القايد والخليفة يهابوك وما يدوروش بيك  . يقللك .. بارينا منو ، هاذاكا صاحب سيدنا .. أما خسارة .

قلتلو : 

المهم سيدي علاش سلمت ؟ 

قاللي : 

من نهارت اللي شديت الحكم . وانا مفجوع . نجي خارج باش نعمل دورة في الجنينة . يقومو الموزيكجية بالترمبيتات متاعهم والطنابر . دم دم دم . يكسرولي راسي . يتحط الفطور . يمررهولي بالدم دم . نجي خارج باش باش نقضي حاجتي . موزيكة الباي تضرب . فاضحيني مالصباح لليل . وساعة على ساعة يدخلو علي هاك جماعة العروش . الواحد منهم كيف يزهر قدامي يطيحلي الدمار في ركايبي .أما كيف يدخل عليا الوزير الأكبر متاعي نفد ويطير نعيمي . بالأخص كيف يبدى يترونق ويتنوفق ويدور منا ويرجع لنا ، ويمد في الأوراق وأنا نختم ، ، نختم ونعرف اللي شطرهم متاع حوفة وتدبير راس في فلوس المكس ، لكني مجبور ، السيد كل ما يمدلي ورقة يقللي :

سيدنا ، ربي يحفظكم ويخليكم ذخر للرعية والايالة ، ماو باش الرعية متاعك تعيش مرتاحة ..

مرتاحة ! وهو وهاك الفاسد الكبير ومتاع الخزنة ، الكلاب الأثنين ، عاملين في خلاها ما والأهل ، ويدك وحديدك مع القياد ، والخلفاوات ، والصباحية  ، وبايات الأمحال ، يكملوا ايمصو دم الرعية ، نهار تنكرت ، ولبست لبسة ماهيش ، وعملت دورة في الأرباض والنواحي ، نلقى الحالة مزمرة مدمرة ، والناس مقملة مسخة جيعانة ، حالتهم تسخف الحجر  وتبكي الصخر . روحت . وقلت ما فيهاش . هاذي حكاية باش تهزني لجهنم . لا ياخويا . نستقيل ونسيب أهل البلاء في البلاء . ...

هاو فتك بالحديث عاد .. أنا في الحقيقة ماكنتش لاهي بحكاية الحكم برشة ، على خاطرني من صغري مغروم بالفن ، ونحب المالوف والشطيح والرديح ، وما تنساش اللي أنا كنت صاحب كيوف زادة .. كل ليلة كانت عندي سهرية تعمل ستة وستين كيف .. حتى لوجوه الفجر .. نقوم تاعب .. مهدود .. ياصاحبي نساء وبنات وعوادجية وكيسان تدور .. كيفاش تحبني نوفق بين _ سوا ديزون _ الثقافة .. والغنا والطرب والشطيح والرديح  ، وهالجو الحلو ، ومسألة تسيير الأيالة باللي فيها .. لقيت المسألة صعيبة برشة ، وحكمت عقلي وضربت خماسي في أسداسي  ، وعملت كيفما يقول هاك المثل : 

كي تلقى الزهو والطرب لا تبدلو لا بشقا ولا بتعب ..

 من حينك سيبت المرمة واللي ثمة .. وتلهيت بكيوفي .. 

قلتلو : 

آآآ .. حكايتك غريبة . لازم الواحد يرجع يقراها على بزو ومعناه .. معناها أنت باي مثقف وفنان ..وبعت الكرسي على خاطر كيوفك ؟ تستقيل مرة واحدة .. اللي نشوفو فيهم تو غادي في الدنيا يعملوا هالعمايل هاذم الكل ، ويعيشو في الخمج من صباحهم لليلهم .. ومن ليلهم  لصباحهم  .. ويبداو شادين في الكراسي لين يموتوا .. عاد أنت تتسمى مثال يحتذى به .. لكن نحب نزيد نسألك سؤال آخر : 

ما تقلليش أشبيك هنا ؟ 

قاللي : 

هاني نستنى .. شي يقللي راك ماشي غادي .. وشيء يقللي لا.. مستحيل أنت عالشيء اللي نعرفوه بلاصتك ما تكون كان غادي .. هاني لتو حاير نستنى في حكم ربي ..