قمت الصباح على غير العادة مخر .. مخر برشه زاده .
ليلة كاملة وانا نتقلب في فرشي !
ما جانيش النوم .. جبدت كتاب نقرأ فيه ، كتاب عالمعجزة الصينية ! شريتو عندي مده ! قلت لازمني نوع قراءاتي ! رشقت عينيا في الصفحة الثالثة بدات عينيا تقفز عالكلام والسطور وما فهمت حتى شيء . ومافرزت حتى حرف . شفت كان السطور متعدية قدام عينيا . رجعت الكتاب عالطابل/د/نوي !
اشنية الحكاية !
خزرت للمنقالة نلقاها ماضي ثلاثة وخمسة من نص الليل !
الوقت موخر ! موخر برشة !
عجب !
انا اللي مستانسة وقت اللي نحط رأسي عالمخده نرقد على طول ! ياقع فيا هكا !
حليت التلفزة ، قعدت نازلة عالكوموند ، التلفزة محطوطة ديما عالاسترا ، فيها برشه شانات تبث افلام قديمة ! و.. هب فجاة نجي في قناة تعرض في فيلم فيه برشه مشاهد شفافة ياسر .. بورنو يعني .. هي رمات الفيسته متاعها عالديفون ، وهو مدلها الكاس ، خذاتو من عندو ، حطتو عالطاولة ، وهي تطبس ، حلت فلسة السورية متاعها بحيث بزازلها قريب تخرج مالسورية ، خذاها من ذراعها وجبدها لصدرو بلطف ، عطاتو الطوع بعدما قالتلو :
عزيزي ! الشراب هذا ما يروينيش ! يرويني الشراب اللي في فمك ، ومشاو لثنين في بوسه طويلة !
مللى سيناريوهات في هالافلام هاذي ! تقولش عليه يجيب في الكلام درا منين !
اوف حتى انا . الليلة الريح تقولش عليها عاملة معايا بلعاني ، عاكستني بالمنجد ! لو كان تشوفني بنتي تو تقول :
ماما خجت في عقلها ، عاملة كي المراهقين !
عندها الحق . هوما المراهقين اللي في وضعيتي هاذي ما يزيدوش عليا برشه !
تعديت لشان اخرى ، وشان اخرى ..هب ونلقى ناشيونال جيوغرافيك ، وحتى هالشان ، بالصدفة ، تعرض في فيلم عالتزاوج بين الحيوانات ! قلت ياوالله احوال !
استخايلت روحي كايني نسمع في ضحكة ، وظهرلي وجهو عالشاشة يغطي المشاهد ويقللي وهو يتبسم :
هاهاها ! شيء ! الليلة مانيش باش تخليك ترقد ! نحب نسهر معاك ! طفيت التلفزه ! حليت البورت/فونيتر ! شيعت عينيا للسماء ! قاللي :
تفرج في النجوم الساهرة معاك ومعايا ومع القمرة !
ضربتني نسمه بارده شوية ، لكنها تنوعش ، فيسع دخلت لبست الروب/د/شانبر متاعي ، ورجعت ، قعدت عالفوتاي ! مللى فرجه في السماء ، ونسمة الليل ماحلاها تمخلل ، وخذاتني غفوة هي بين اللحضة والساعات ، وحلمت ، جريت ولعبت وحبيت وضحكت وتبست وبست وتعنقت وعنقت وغنيت وشطحت ، كي مدلي الكاس ، قلتلو وانا ناخذو من يدو ونترشف منو الرشفه لولى :
قداش لذيذ وبنين هالشراب !
خذا من يدي الكاس ، حطو عالطاولة ، قاللي :
الشراب اللي في شفايك ابن واحلى ! نحب نسكر ونفنى فيهم !
حطيت راسي على صدرو وقلتلو وانا نتدلل :
ووه ! لا يجعلني جرة !
ما فقت كان كي سمعت حس كهربة متعدية تزف ! اه .. قلت :
شبيني لهنا لتو منطولة عالفوتاي متاع البلكونة !
قمت فيسع ! دخلت ! سكرت الباب متاع البورت/فونيتر ! ونزلت عالفلسة متاع السطور باش هبطتو ! وترميت عالديفون ، خذاتني عيني ! تعبت ! غلبني النوم ما فقت كان التسعة وربع متاع الصباح ، الشمس زرقت ! والدنيا ضوات ، وحيات والنهار بدأ بعدها ، دخلت لبيتي نحيت حوايجالنوم ، دخلت لبيت البانو . دوشت ، عملت طلية شامبوان وطلية صابون وخليت روحي تحت الماء ! ايه ما بنو الماء هابط ملذذ على بدني الكل . بالمنجد متعة !
لفيت شعري بالمنشفه ، لبست الكاب/د/بان وترميت بكلي عالسرير . جبدت نفس طويل . رشقت عينيا في السقف قلتلو :
عيب عليك يا اسمك انت تعمل فيا هكا ليلة كاملة !
تبسملي هاك التبسيمة وقال :
اش نقول انا يا عزيزتي مللي شفتك عينيا ما راتش النوم !
اوه هاو بدا يسيب في العسول متاعو من تو عالصباح ، اش باش نعمللو ، اش تحبني نعمل فيك عالصباح ! فسدتلي نومي وفرعستلي حياتي وشقلبتلي اموري الكل !
انا خذيت السشوار ، حليتو ، وبديت نجبد في شعري . شفت مليح وثبتت في ملامح وجهي بالتفصيل ، مصللي عالنبي عليا ، وجهي ، وجبيني ، وحواجبي ، وعينيا ، عينيا العسلي ما حلاهم ومحلى خزرتي ، وماحلى خدودي ، ماعنديش تجليد في وجهي ، وخدودي موردين ، وخشمي ،وشفايفي ، ودقنونتي ، ورقبتي ، شفتهم مليح ، وخزرتلهم في المرايا وانا نسشور ! قلت لروحي :
ما حلاني الحمد لله مانيش سمينه . سلسه ، ومانيش طويلة ومانيش قصيره . كايني مرا في لربعين ، هازه صحتها وماشية للدنيا باش نأخذ منها اللي تحب . مرا قرأت وخدمت وعرست وجابت لولاد ، ومنعتهم ، تو ما قعد كا تتلهى بروحها وتشرب من لذة الحياة وتشوف الدنيا ، هو صحيح انا مكهبة على ... اوه ، الساعة ما يضهرش عليا ، حتى بنتي قالت ما يضهرش عليا ، وموش كان بنتي هيا اللي قالت . لا . ثمه برشة مللي يشوفوني و يعرفوني يقولولي :
صحة ليك . ما يضهرش عليك العمر !
كي نحيت الكاب/د/بان ، خزرت لبدني الكل ، صدري الحمد لله مازال مكبوس ، وشادد روحو حتى من غير سوتيان ، ما عنديش هاك البزازل المسيبة ، وزنودي كيف كيف ، وكرشي الحمد لله ميش مقدمة لقدام ، مازلت زفالت ، حتى فخاذي مشحوطين ، وفاراتي مافيهمش لا زروقية ولاهم يحزنون ، وقشرتي ماشاء الله ، شعري شعرة بشعره ، اللي يشوفني يقللي :
مزينك . صحه ليك ، شعرك زايد فيك الشطر !
( نكملو البقية وقت آخر ان شاء الله )
-------------------------------------------
(. ** ) تدوينة نشرت في 30 ماي 2018
Aucun commentaire:
Enregistrer un commentaire