ما نطولو بحديث ، الوافي طالع بين السواني ، يدز في بسكلاتو مروح مالخدمة ، وحاطط القطعية في القفة ماللوطة ومغطي الدبيبزتين بالمنديلة بجنب القاميلة ، وباش يتلف مليح الجرة حاطط من فوق خبزة متاع كوشة ، وين وصل بحذا سيدي صالح يشوف العجمي وزكارتو معاه ، يكركرو في بلايزهم وداخلين لسيدي صالح ، كانو في شيرة سيدي بوقبرين ، قالو نرتاحو شوية في سيدي صالح ، ترمى عليهم الوافي :
عجمي يكب والله سعدك ! وقتاش جيت مستانس قبل ما تجي للدشرة تقللي !
قاللو العجمي :
كملت . يلعن جد اصل هالدشرة متاعكم ملقيتو تسكنو كان في تنقورة الجيل ! ياخي ضاقت عليكم الدنيا . بالحرام حيلي تهد ، وأني نتبع في العراضة !
قاللو الوافي :
ايا بره ادخل لسيدي صالح برد حالتك وشد دخل هالقفة معاك خليني نعمل طله عالدار نشوف نلقاش حويجة تتاكل ونجيب معايا كيسان ونرجع فيسع .
اكاهو . شوية . ورجع الوافي . يلقى الجماعة بردت حالتها . وتمدت على جرتيلة حصيرة متاع حلفة ، وريحة البخورات والشمع تصوني ، حطو القطعية جاب الوافي كعيبات زيتون ساحلي ، ومرمز بالدجاج العربي ، وكسرة الطابونة ما زالت سخونة تشهي ، وشطير دلاعة ، وقال للعجمي :
هيا تكماسا حل ، وسيب المرابيط ، قداش باش نقعدلك ياكازي وانت كي البياع نهار كامل من دشرة لدشرة . وقتاش يتوب عليك ربي وتزي مالتسلعيق يخلي دمرك ياخي ما فديتش من ماخذت النساء !؟
قاللو العجمي وهو يحل في دبوزة الشراب ويضحك :
والله ما قعدت كان دشرتكم ما شربتش من عسلها !
قاللو الفاهم :
تشرب الحنضل وتاكل التيفاف ونحطوك في الحماضة تسرح مع البل .. دويو عسلنا ان شاء الله يززي اماليه . صب واشرب ويزي مالنبيح !
حلو الدبيبزه لولى وشربو وكملو الدبوزه الثانية ، في الكاس لخر ، قال واحد مالزكارة ، والله ان شاء الله يسامحنا سيدي صالح ، لو كان يفيق بينا الحفيظ بالحرام الا ما يبيلكنا ، ومن بعد ختموها بكويس تاي احمر . هز الفاهم بقتاجو في القفة ، وهو خارج قال للعجمي :
ان شاء الله السكرة تطير ، قبل ما تطلع لدار العرس وتزيد تترسها قد قد وتجي تضرب على طبالك تلقى روحك مكبوب فوقو .
قاللو العجمي :
لاه يافالح هالفال تستفايلي فيه تحب تقطعلي خبزتي .
خرج الفالح روح لدارو وقعد سي العجمي تمد هو والزكارة عالحصيرة ، خذاتهم عينيهم مع التماسي جاهم الوروار ، يعيط :
ياعجمي . ياعجمي . ياخي لتو راقدين . فزو عاد . امالي العرس يستناو . عشاكم حاضر . تعشاو ، وبدلو حوايجكم ولبسوا جبايبكم وحضروا ماعونكم . والصانعة ثمة شكون ركبلها لسوسة باش يجيبها .
قاللو العجمي :
اش باش يطلعنا في الصعادي متاعكم بالله شي يهد الحيل ، ما نوصلو للكاف كان ببركة سيدي صالح .
قاللو الوروار : '
يطيح فيك سيدي صالح عالشي اللي تعمل فيه .
هاذي اول مرة تجي صانعة مع طبال للدشره ، بحيثو هذا زاد عطا اهمية كبيرة لسهرية الحنة ،
والناس بداو يتحدثو ..
قاللك ثمه صانعة جايه مع العجمي ترقص وتغني .
قال واحد لصاحبو باللأزمة الا ما تهيج الشبيبة والشياب
قاللو صاحبو : هي اللي باش تورش في الرشيقة .
الحاصيلو منداف تحطلنا باش ترصيلنا نرشقو بالزايد . الواحد ما ينجمش يرشق أقل من خمسة آلاف .
خرج العجمي وجماعتو . خلطت الصانعة . فاضاولها بيت . تعشات . ولبست حرامها وحمرت وسوكت وعملت نكته حرقوص على خدها . وحطت اللوبان في فمها وبدات تلوك . وجبدت تقارطها ، وحزمت روحها بالشمله . والطبال في البطحاء يضرب والزكارة تزكر والبخور عامل عجعاجي على نغمة غناية ( بره ويجا عالجرجار ما ترد اخبار ) وضو لمباره البريموس تقولش عليه ضو نهار . ترتيحه مالترتيحات العجمي بدا يكحكح قاللو الفالح يفدلك عليه :
يكب والله سعدك ياعجمي بديت السهرية بمناحة . غنيلنا ياخويا نحبوك تعمللنا جو . وربي يرحمو الجرجار . تغني عليه في دشرتنا ماو لا باس .
قامت الناس كيخ كيخ بالضحك نساء ورجال .
ضرب العجمي ضريبات عالطبلة وغمز الزكار . بدلو النغمة ، وبدا يطبل ويشطح والزكارة معاه وهاك الروبه البيضة كابسة على حزامو مع الشملة والصباط والكلاسط بيض ، والكبوس بالنوارة الكحلة الطويلة ، يقدم ويوخر ويطبل ويدور ويوللي يتقشع لتالي وطبس شويه لقدام ويحط الطبال قدامو ساعات ويحط الطبال فوق راسو ساعات . واللي يقللو الله الله عليك ياعجمي . والمرافق يبخرلو ، ويصيح :
زغرطو يانساء ! العاشق في النبي يصلي عليه . ياحوات . الوشق والداد في عين الحساد . الله الله عليك ياعجمي .
سي العجمي تخمر . وعجبو الجو . والراجل ضارب كيسان شراب اللي هو . وزاد ترسها في العشاء مع برجين دلاع وكاس تاي . وقام يطبل ويغني ويشطح والحس والتزغريط وريحة البخور . تكوخر المسكين . في دوره مالدورات وهو باش يهز الطبال يحطو فوق راسو ويعمل مناورة باش يدور ويتقشع لتالي يعثر في كانون البخور شويه لا جا ماخذ طولو . بحيث كان ينجم يطيح يجي ما في عينو بله . جاب ربي الطيحة جات عالركبة على خاطر واحد مالزكارة شدو وعرضلو يدو والا المسكين كان يجي على وجهو يدمدم . فيسع . لقفوه . دخلوه لبيت مالبيوت خلط عليه الفالح . عمل تبريده لوجهو وخزر للفالح قاللو :
ريت جرايرك المنحسة ماو سي الفالح ؟ من اليوم لا عاد تعرفني ولا نعرفك غوثت فيها شوية لا كليتها في عضامي ومسلاني قريب يتنخا ونقعد حطيطة .!
ضحك الفالح وقاللو :
ما تخافش عمر الكلاب طويل . مالا انت تتلطى على سيدي صالح وتسكر بحذا السناجق.. هاونو طاح فيك . ومدلو سيغارو . وحط يدو على كتفو قاللو :
اللطف عليك ياعجمي يافنان . الله لا يورينا فيك هاك النهار
ايا قوم كمل السهرية جاب ربي المره هاذي جبت معاك صانعة تو تشيخها وتعمل جو وترتحك .
Aucun commentaire:
Enregistrer un commentaire