حضرية تزغرط نهار الانتخاب في دشرتنا

بعد ما جا متاع لجنة التنسيق ، الأحد اللي فات ،ونفخلنا جنابنا بكلام ، حفظناه مالأذاعة والتلفزة والجرايد ، قال : 

الحمد لله اللي تونس عايشه في الأزدهار ، بفضل حنكة وحكمة المجاهد لكبر ...

 وهنا قام التصفيق والزغاريط ويحيا المجاهد الأكبر ، وكمل خردوق اللجنة ، قال : 

وبفضل حكومتنا الرشيدة بقيادة الرجل العظيم الأستاذ ،،،، وبرعاية وإشراف السيد الوالي ، والسيد الكاتب العام للجنة التنسيق الأخ المناضل .... وكذلك ، السيد المعتمد ، والسيد رئيس الدايرة الحزبية ، وكل المناضلين في الدشرة ، هاذي المعروفين بولائهم للمجاهد الأكبر  ، ولحكومتو الرشيدة .. نحبو يكون نهار الأحد الجاي نهار عرس آنتخابي ،

اي نعم ، نهار ممارسة التوانسة لحقهم في آختيار شكون يحكمهم ، ويسيرهم ، ويقود مسيرتهم الموفقة ، وبالطبيعة ما نحتاجوش باش نذكرو اللي نحنا آخترنا قيادتنا عن آقتناع.، ونهار الأحد هو يوم إثبات هالأختيار ..

ومن بعد خذا رئيس الشعبة الكلمة وقال : 

اللي كنت باش نقولو ، قالو الأخ المناضل ، ونحنا الكل وراء الزعيم والقائد المفدى. ،ربي يطوللنا في عمرو وفي عمر حكومتو ، وعمر السيد الوالي ، والأخ رئيس لجنة التنسيق ، وتو ما بقالنا كان نختمو آجتماعنا : 

وتم إنشاد : ألا خلدي ...

وزغرطت النساء ، وصفقت الرجال ، وتباوسوا جماعة الأجتماع ، العمدة ، ورئيس الشعبة ، وخردوق لجنة النسيق ، ومن بعد دخلوه كلا الكسكسي باللحم وشرب اللبن ، وشرب كاس تاي ، وتسرسب رجع منين جاء .. 

اليوم صبحنا عالأنتخابات ، البراح ، عبد النبي ، من نهار الجمعة وهو يبرح :

يامالي البلاد ، الشيخ قاللكم ، لازمكم تحضروا نهار الأحد الصباح ، قبل نص النهار ، باش تنتخبوا ، نساء ورجال ، واللي سمع يقول للي ما سمعش ، واللي يغيب ما يلوم كان روحو .

اي نعم ، ما يلوم كان روحو ..

بالله سامحوني ناخذ فرصة باش نضحك شوية على انتخابات هالنهارين ، اللي ولات الأصوات فيها تتباع وتتشرى ، ولو كان حضرية جات عايشة. راهي دب ت رأسها في جرت سمسارة اليوم .

نرجعو لحكايتنا ..

حانوت الشيخ ، الشيخ  اللي وللى يتسمى عمدة ، هو مكتب الأنتخاب ، تتنصبت فيه طاولة لوح ، عليها طرف قماش ،  فمه  وزوز كراسي  و دفتر ،

 الشيخ قاعد  عالدكانة ، وبحذاه رئيس الشعبة والمدب ، وعمك الفالح قاعد عالحصيره يركرك في التاي ، 

أول واحدة طلت حضرية ، دارها في الحدرة ، قريبة للحومة ، رجعت مالسوق بكري ، قالت :

نمشي لهاشيقولو عليه ، خير مللي الشيخ يتغشش ، 

هي دوب ما طلت في راس الحومة ، والفالح خارج باش يمصمص كيسان التاي ، شافها قاللها : 

أشنوه . بديت على بكري ياحضرية . 

قالتلو : 

أسكت يكب والله سعدك . 

قاللها : 

مللي ريت وجهك سعدي تكب ، أدخل .. أدخل برك اليوم جيت في شفاعة الشيخ ورئيس الشعبة .. 

قالتلو : 

والا باقاها تو تعمل هدرة . 

عتبت حضرية . صبحت عالشيخ وعلى رئيس الشعبة ، وقالت :  

أيا هاني جيت أش نعمل ، 

وتلفتت للزوز أولاد عالطاولة وقالت : 

تي هيا قللي ياولد دوجة .. 

قاللها الطفل : 

هات صبعك غطسو في صندوق لحبار وهات نحطلك صبعك عالورقة قدام أسمك ، هكا ياأمي حضرية تكون آنتخبت المجاهد لكبر رئيس لتونس كي العادة، وجماعة مجلس الأمة .

قالت حضرية : 

إيه وليدي ربي ينصرو على من يعاديه ، حتى إحنا ما عناش غيرو ، ربي ينصرو هو واللي معاه وربي ينصر الشيخ ورئيس الشعبة ، وزغرطت حضرية ، وقالت يحيا بورقيبة . وخرجت .

حضرية المقهورة ، الماعندها شيء والماعندها حد واللي ما تاخذ في شيء وما يتعطالها شيء واللي تخدم على هم زمانها باش تستقات ، حضرية كي نسا دشرتنا ، مكثر نساء دشرتنا يخدمو في نسجان الحصيرة ، ويلمو الحلفاء ، ويجيبو الحطب ، والله اعلم ، النحاسة آش يتحط فيها ، باش يطيب ، ساعات حسو ، وإلا بازين ، وإلا محمصة بالطماطم .. حضرية ، مللي رجعت من بنزرت ، هي وولدها ، رجعت بفقرها ، الأستعمار خرج ، وولدها كان  يخدم يوماتي ، وهوما عايشين ، مشى عسكر الفرانسيس ، وتسكرت الثنايا ، وجا التعاضد ، وكثر الكلام والتبهبير ، وباش .. وباش .. وباش .. وشيء ما وقع ، حضرية ما شافتش نهار خير ، في قلبها تقول : 

ياعنبو هالأستقلال ، باش جانا ، كان بالميزيرية  ، أش تعمل حضرية تو .. هه، حضرية الكلبة بنت الكلب المقهورة المحقورة ، تطلع وتحط صبعها في الحبار وتزغرط وتقول يحيا .. مللى زمان كلب ، شيء ما تغير فيه ، كان الشيخ متاع قبل كبر وهرم وتحط خرجوه ، وجا في بلاصتو هالشيخ هذا ، كان مدب ، ومرماجي ووللى شيخ .. وهانا نزغرطولو ونقولو يحيا الشيخ .. ويحيا رئيس الشعبة ويحا الكلاب الكل .. حضرية نزغرط ... حضرية تضحك .. حضرية تلم الحطب ، حضرية تقلع الحلفاء حضريه تنسج الحصيرة ، باش تعيش .. حضرية حفيانة حتى جرد بلغة ما تكبهاش ، والعام على طولو تحك في جرد تخليلة زرقه لين بلاحت وتجرتلت .. تفوه على جد أصل هالدرة وعللي فيها واحد .. واحد.. روح توه ياحضريه ، أمش تكب عالكانون ، وشعل العافية وحط النحاسة وآرم المحمص والطماطم ، وشوف شكون يعطيك طرف زيت باش تفوح النحاسة .. 

( نرجعو وقت آخر .. )