(رسالة الغفران .. ( لقاء مع ابليس

المرة هاذي كيف طالت قعدتي ، ناديت عالمضيف ، قلتلو وانا محتقن ومتنرفز : 

شوف سيدي ، أنا راني ماجيتش باش نضيع برشة وقت لهنا ، ما زال عندي ما نعمل في الدنيا .. آآآ من فضلك هاك الروتين متاع آستنى شوية ، ووسع بالك ، وما عادش المسألة تبطى، دقيقة برك ، والدقيقة عندكم سيدي لهنا ، بملايين السنوات الضوئية ، يعني يمكن ياسر بل بالتأكيد كيف نرجع غادي نلقى الأمور تقلبت سافلها على عاليها .. عاد بحيث من فضلك سرعلي الأمور ، وما تطولش المشاور .. 

المظيف قام يضحك .. راهو وللى يتصكك بالضحك ، تقولش عليا قلتلو نكتة ، زدت تنرفزت ، والدم طلع لراسي وقلتلو : 

شوف لحد هنا ويوفى كل شيء .. من فضلك انا راني جاي في مهمة .. ما تخلينيش ملطوع لهنا .. 

جاوبني : 

شوف سيدي ، هاني ما زلت حافظ مقامك ، أما زيدني شوية وقت ، وباش ما تقلقش هاني باش نجيبلك واحد تعرفو ويعرفك ، لخرى أعط كلمة وخوذ كلمة معاه .. 

قلتلو : 

عجب ، ثمة شكون موجود لهنا من معارفي .. 

قام يتصكك بالضحك ، ويضرب بساقيه في القاعة ، لين قريب يغص مالضحك .. وقاللي : 

أي نعم .. غمض عينك وحلها تو تلقاه قدامك .. الساعة مللي جيت وهو يتبع فيك وعامل عليك كيف موش نرمال .. كيف سألتو عليك قاللي : 

هاك السيد واحد مالجماعة اللي عديت معاه دهر وأنا وياه قلبة بقلبة .. ساعات نجبدو نطيحو .. وساعات يرخ بيا نطيحح .. دهر كامل وآحنا هكاكة ..

قلتلو : 

الساعة أنا ما تصارعت مع حتى حد في الدنيا .. انا كنت غاديكا من اجبن خلق ربي .. ناكل لقمتي مسارقة ونمشي الحيط الحيط لا نحب ناذي الغير ولا نخللي الغير ياذيني .. كيفاش تقللي هالسيد كنت نتصارع معاه .. آآآ هذا مايكون كان كذاب وسفيه وما يستاهلش القدر .. 

هكاكة وينقز قدامي هالهامة ، وجه منكور ، ولبسة غريبة لا هيا من لبست الأنس ولا هي من لبست الجان .. رغم اللي أنا ما نعرفش الجان .. كان في التصاور .. وقاللي : 

عجايب .. عجايب .. فيسع تنسى العشرة .. وتنسى الصحبة ؟

ومن بعد ضحك وقاللي : 

أنا صديقكم .. ورفيقكم ومؤنس وحدتكم .. أنا أبليس .. هاهاها .. وجلجلت ضحكتو ،، تقولش عليه آسترجع أيامو  السعيدة غاديكا ..

الحقيقة تهزيت وتحطيت في بلاصتي ، ومكنتني الرعشة ، وحسيت اللي أنا في وضعية مهلهلة ، وبديت نشعر بالهزيمة .. هذا أبليس ، ماهوش مسألة متاع تفدليك .. واللعب معاه عالمكشوف .. وكل شيء عندو موثق نية وصوت وصورة .. آش باش نعمل معاه هالزفت ؟.. خممت .. خممت .. ومن بعد استجمعت شجاعتي ووقفتلو بطولي وصحت في وجهو : 

شوف ياملعون .. هنا ماعندكش عليا لا سلطة ولا سلطان .. بالعكس أنت هنا ، يلزمك تسجدلي بآحترام . أنا ولد التراب وانت مخلوق النار .. ومع هذا اللي خلقنا الأثنين آمرك باش تسجدلنا .. لكنك خسيس وواطي ولئيم ، رفضت وآستكبرت .. قدام شكون ؟ قدام اللي خلقك وخلقني .. 

ترعد ، وركايبو بدات تضرب في بعظها وقاللي : 

أشنوة جبدت ماعون الصنعة .. بديت تسيب في الخبث متاعك .. راك ما قهرتني كان بهالبلوط اللي قاعد تحكي فيه ، أكاهو ، تحطني في الزاوية وطاكيني بموقفي مع ربي .. أي نعم أنا قلت لربي مانسجدلكمش ، صحيح ربي تغشش عليا برشة ، وآغتاظ .. لكنو ما منعنيش من ممارسة حقي في الأعتراض .. آش عندك ما تقول .. هاكم اليوم ، كل واحد ماخذ بلاصة ويتحدث باسم الخالق ويقتل ويمنع ويمنح باسم الخالق .. مع أنو الخالق ، عطانا هالحرية .. صحيح أنا باش نتحاسب .. أما باش نتحاسب على أعمالي في غوايتكم وجركم للتناحر والتقاتل والبغض .. على خاطر نحس اللي انتوما ماكمش خير منا نحنا جنس الشياطين ..

قلتلو فما مسألة باش نعطيك فيها الحق وهي مسألة تمسكك بحرية آختيارك قدام المولى .. ولكن زادة ما تنساش ، اللي المولى عز وجل كان في حسبانو كيف خلقك وخلقنا ، أن الحرية مكون رئيسي من مكونات ممارستنا للوجود ..  ننجم نقللك عندك الحق .. وقت نخزر للحرية اللي ما منعهاش الخالق لمخلوق كيفك حتى وهو يقللو .. لا .. ما نسجدش لبنادم .. أنا خير منو .. خلقتني من نار وخلقتو من طين .. وزدت هردتها على روحك كيف قلتلو ( لأقعدن لهم ) .. يعني عصيان أوامر .. وتمرد .. بالطبيعة أنت مصيرك باش يكون مهرود برشة ، وهالناس اللي قعدتلهم ، وجريتهم للمهالك ، باش يكون ذنبهم في رقبتك .. لكن أنا زادة نحب نقللك اللي المولى عز وجل ، كان كريم معاك ومعانا ، لأنو منحنا نحنا ، هالحرية ، وعطانا هالحياة باش نعيشوها بالطول وبالعرض ، وكان المولى ، لو كان حب ، يخلينا في الجنة ، ووقتها ما كنت تنجم تعمل حتى شيء ، كنت تحفر حفرة في النار .. 

ضحك الشيطان وقاللي أنا نمارس في حريتي .. أما أنتم ، هاني قاعد نشوف فيكم ، يابوك واحد يقول ، قو ، تو يقوملو ألف مفتي ، وألف متستر بالدين ، ويكفرو ، ويستبيح دمو .. 

حريتكم اللي منحهالكم ربي ،، فكوهالكم تجار الدين .. 

حريتي اللي منحهالي ربي .. ما فكهالي حد ..

هذاكا علاش أنا ما زلت نعتبر نفسي ، وهي معصية وموقف مضاد للأرادة الألهية ،  خير منكم .. خير منكم .. 

ضحك الشيطان ، وفاتني وخلاني في حيرتي .. 

وجاني المظيف وقاللي ما تاخذش عليه .. شيطان رجيم ..