( راقصة عدم .. (الجزء الثاني

 بو عيشه ، اللي عطات لروحها اسم عواطف ، عمك صالح كارانط ، كان خدام في الكبانية ، مكسبو هيا ، قراها في المدرسة ، خذات السيزيام . كملت الثانوي ونجحت في الباكالوريا  ، دخلت للكلية ، قرات الإنجليزية . خذات الاجازة ..

وحطت ساقيها لثنين في ثنية الدنيا/الغابة ..

وبدأت كي الشباب الكل ، تلوج على خدمة ، طفلة ، من دشرة مرمية في الآفاق ، لا معارف لا أكتاف ، كل باب تدقو تلقاه محلول لكن العينين كانت مغروسة ، في هالجسد اللي بكلو انوثة واغراء ،،

فهمت اللي الشرط صعيب ،

عالم بكللو ذيابة هالادارة ..

غابة ..

موش قلنا حطت ساقيها لثنين في ثنية الغابة .. 

لازم تدفع رشوة ..

والرشوه اللي طالبينها منها هو جسدها ..

ملا بلاد ، وملا مدينة ، وملا إدارة ..

مالا انا علاش قريت هالقراية هاذي ..

وبابا ، علاش صرف عليا هالمصروف هذا الكل ، اشنوه ، باش نمشي في لخر ، نبيع كرامتي !

لازم حل ..

ولازمني نقول لبابا عللي نفكر فيه .. 

وقت اللي حدثت بوها عألمواقف الرخيصة اللي تعرضتلها ، كي قابلت برشه مسؤولين ، على اساس باش يخدموها ،

بوها قاللها :

شوف يابنتي ، هاك تشوف في الدنيا كيفاش ولات ، وأنت دليلك ملك ، نصيحتي ليك كان مازلت ننجم ننصحك ، انت توه عندك زوز اسلحة ،  سلاح دمار شامل ، تنجم تهزم بيه اللي ياقف قدامك إذا تحسن استعمالو بطريقة ذكية ، والسلاح التقليدي لآخر ، اللي تنجم تدافع بيه على وجودك ، وأنت عقلك في راسك ، لكن نقللك ، تنجح كي تستعملهم لثنين مع بعضهم بطريقة ذكية ..

هوما ، يخزرولنا باعتبارنا اقعار ، وبدو ، اولاد ريف ، من ورا البلايك ، لقمة ساهلة وبارده ،  يعطيوا لانفسهم الحق ، باش يتعاملوا معانا باعتبارهم ، هوما الاسياد ، ونحنا العبيد ...

حتى اللي خارجين من برورنا ، ووصلوا ، كي يحطوا ترمهم على كراسي السلطة ، يعملوا نفس الشيء ، يقفزوا ، ويمارسوا حتى هوما قذاراتهم وتسوقيطهم مع الناس اللي خرجوا من ترابهم وطينهم ، ويوللي اللي هذا يحب يمد يدو وياكل

ويتعدى !

بوها ، في الاصل كان مقاول صغير ، في مدينة متوسطة ، عايش مستكفي بنفسو ، يخدم ويروح لدارو في الدشرة ، ويجيك البلاء ياغافل !

على غفلة ، هبط عليه المعتمد ، ولجنة التنسيق ، والوالي ، قال شنوه قال لازمك تتبرع ، وتبني مستوصف ، لدشرة الحمارنة ، الدشرة اللي في نواحيهم ، في حملة برنامج التبرعات لصندوق النهب سيء السمعة ، الشهير بصندوق 26/26  . 

قاللهم  :

الله يبارك ، نعاون بزوز خدامة يد عاملة ، حاضر عالراس والعين ، لكن السلعة راهو ما في حاليش ،

قاملو كاتب عام لجنة الحزب قاللو :

شنوه ، شنوه  ، هو الرئيس جاي يستعطى عليك !  تبني وتتحمل المصاريف يد عاملة وسلعة ، وراسك لوطا ، هذا برنامج صانع التغيير راهو ! 

حاصيلو ، من كلمة لكلمة ، رصاتلو المسكين ، في ثلاثة شهر حبس ، وفيسك ، وبيعوه في شوية الماتريال اللي عندو ، والدين اللي عندو في البلدية ، وفي الولاية ، ما خلصوهش فيه ، وخرج الراجل يمرد  ، ولو كان موش طبة الأرض اللي عند امو ، راهو من نهارو خرج يساسي !

عاد كي قلبو مناظرهم هاك الزنوس المايلة ، اللي تسببولوا

 في الكارثة ، عمل يدين وساقين ، ودخل خدام في الكبانية ، لاهي بالترقيع والصيانة متاع البنايات متاعها ، اهي على كل حال ، خدمة فيها دخل يستر بيه روحو ، ويقري بنتو ، ويعيش كي خلق ربي الكل .

عواطف ، وهي تخزر لبوها ، وتسمع فيه ، تذكرت هاك الحادثة الحرفة ، وهيا في سنة التخرج ، وتشوف في بوها مسكين يتكب ويتقعد ، كيفاش استاذ مالاساتذة متاعها ، رمي عليها سميطتو ، وحب يهزها للبرطمان متاعو ، لكنها حاولت باش تفهمو اللي هيا ما عندهاش استعداد باش تشري اعدادها برقده معاه ، وهوما في القهوة ، وللى السيد يساوم فيها ، يا ترقد معايا ، يا نخليك تعاود العام ، هاو ثمه استاذ من جهتهم ولد حلال ، هزت وحطت ، وقالت نمشي نحكيلو بعدما كملت  قالتلو :

تو يرضيك سيدي ، نكبة بابا ، ونزيد انا ننكبو فيا انا .. 

خذا الاستاذ المسألة بجد وتصرف بشهامة ، ومشى مرمد زميلو ، ومسح بيه القاعة قدام زملاه ، لين السيد وللى سيبني نشعف ..

بعدما سمعت كلام بوها ، فهمت عواطف اللي لازمها تعمل ظوافر حديد ، وما يلزمهاش تخللي روحها ، فريسة للضبوعة.، ولازمها تعمل اللي يلزمو يتعمل ، باش تأخذ موقعها في البلاد ، وفي الحياة ، ما يلزمهاش تتاكل كيفما اتاكل بوها .

اه يا عواطف ، ما أصعب ثنيتك !

وما أصعب ظروفك !

وما أصعب وقتك !

بدأت عواطف تمشي في ثنية طويلة ، فيها كل أنواع الوحوش الضارية  ، وكان لازمها تتسلح بنفس عقيدة الوحوش ، وتمشي في المسارب الكل ، وفي الثنايا الكل ، للايقاع باللي يجي في ثنيتها من هالوحوش الكاسرة !

عرفت اللي باب الدخول لهالوسط الفاسد ، مفتاحو عندها ، وصممت باش تدخل وتأخذ بلاصتها ، وتقهر وتنتقم من كل اللي فسدوا ، وعملوا كل شيء باش يركعوا الغلابة اللي كيف بوها وكيف الآلاف اللي عاناوا مالقهر والظلم والاستبداد ، ربما أقسى مللي عاناه بوها ..

وحبل الفساد طويل ، ما يوفاش ، وما عندوش قياس ، لكن حبل الصبر أطول ، واشد ، وأقوى  ، واللي يصبر ينتصر وينال ..

هكا حدثت نفسها عيشة ، بنت الدشرة المرمية في الآفاق ، واللي عطات لنفسها ، اسم عواطف ..  وهي تبدأ مسيرتها

 في غابة الوحوش ..

(  نلتقي في الجزء الثالث )