الطبية والليل 2/2

ما رقدتش ، ليلة كاملة وهي تتقلب في فرشها ، بنتها جات بحذاها ، قالتلها :

نحب نرقد عندك ، 

قالتلها : 

لا ماما ، نرقدو في فرشنا . بيزو لماما . وآمش نني في فرشك ، 

بنتها قالتلها : 

أحكي لي حكاية 

قالتلها : 

ماني حكيتلك 

قالتلها : 

نحب حكاية أخرى 

هزتها لبيتها ، تكاتها على ذراعها ، قالتلها آش تحب نحكيلك عزيزتي 

قالتلها :

 على الأمير اللي جاء وهز هاك البنية الباهية وركبها على حصانو لبيض. 

بينها بين روحها قالت : 

حتى أنت بنيتي ماكش باش تجيبها البر . أنت وياه ياسر عليا . سرحت بخيالها ،

تعدى نهار لحد . نهار موش كيف النهارات الكل . 

مشات للماغزان ، قضات . مشات للحجامة ، قعدت عالحاسوب متاعها ، جبدت التصاور القديمه والجديدة ، عرس . أعراس . أعياد ميلاد . مناسبات . خواتها . أولاد . بنات . أصحاب . أقارب . طبقت الحاسوب . قريب تكسرو . شعلت  سيغارو ، طيبت قهوة . مدت ساقيها عالطاولة . جبدت كتاب . باولو كويلو . بدات تقرا . قالت ( أف ... فديت ) . لوحت الكتاب على طول يدها . قالت : 

  محسوب  علم جديد وإلا آختراع .. أشنوه الفرق بين حداشندقيقة ، وبين سبعة دقايق . هذا يتوقف على المرا وعلى الراجل . وعلاش موش عشرين دقيقة .ياخي تركيبة العباد كيف كيف هي ؟ زعمة اللي في أفريقيا واللاد السخونة ينطبق عليهم هالكلام ؟ حتى هالكتاب يزمرو وحدهم ، مالبرازيل ، طياره ، ماشي وجاي ، جنيف ، وثلج ومرا متاع جنس ، باش في لخر يتحدث على مدة العملية ، ملا كتاب ، شراتني فيه مرت خويا ، لتو تهتري بيه ، قالتلي : 

ياسخطة يفيدك في اختصاصك ،  

قلتلها :

من انا ناحية ؟

قالتلي : 

نتصور يجيوك دي_ باسيون ، عندهم مشاكل من هالنوع ، 

قلتلها وأنا نضحك : 

عزيزتي ، في الموضوع هذا ، بكلنا دي_ باسيون .

التلفون ضرب ، هزت . أمها عالخط . قالتلها :

هاني جايه . تعرضلي . الترينو يخلط الخمسة .

مشات  وجات . قعدت  ووقفت . طلت مالشباك . عندها حوض متاع ورد عمرها ولا تلهات بيه . امها هيا اللي لاهية بيه . سقاتو ، باقي تصويرتو قدام عينيها . قالت كايني تكلم فيه : 

ياولدي وسع الثنية ، أبعد من قدامي . أش سلطك عليا . أش دخلك في حياتي . ما صدقت لربي خرجت ، ما نحبش . ما حاجتيش بالحب . فديت مالحب . كرهت حاجة أسمها حب . 

شيء . باقي التنصويره قدام عينيها . وهو يتبسم ، رامي عليها روحو . كاينو يقوللها : 

شيء مانيش مسيبك ، مانيش مهبول باش نفرط فيك . أنت فرصتي لخره في الحياة ، 

قالتلو : 

بربي خطاني . مواجعي تحيرت . ما عادش فيا راني . ذوبتني . آش عملتلك .

قاللها : 

ما عادش نجم نصبر . مللي ريتك وانا متحير . مهزوز . كايني أول مره في حياتي نشوف مرا .. مرا ..مرا بالمنجد  . زين وقد ومشاعر وقلب حنين ورقة وأناقة . 

قالتلو : زيناش تو مالرطابة راك ذوبتني .. 

بنتها ، جاتها للبلكون وهي فرحانة كيف الفرططو وكيف العصفورة  تزقزق قالتلها :

ماما . ماما . 

هي باقي سارحه مع خيالها . مغامرتها اللي بدات وقاعده متواصله في خيالها المجنون ، عاودت بنتها تعيطلها وشدتها من يدها . فاقت . قالتلها : 

شبيك عزيزتي ؟ 

قالتلها : 

طلع شكون جا ؟ 

قالتلها : 

عزيزتي ، كيفاش نعرف شكون جا وانا في البلكون . وشكون باش يجينا تو ؟

بنتها قالتلها : 

لو كان نقللك ما تصدقش ؟ 

قالتلها : 

شكون ؟ 

بنتها جبدتها من يدها بلطف . خزرت تلقى خوها . وبحذاه راجلها . تزعزع كيانها . تربثت تقولش عليها عاملة عملة . وجهها حمار . لعبت عليها دوخة . ما عرفتش آش تعمل . ما عرفتش كيفاش تتصرف . تقولش عليها تشدت مع الراجل . وقف خوها . وقف راجلها اللي كان . . ما لقات كيفاش تتصرف ، ترمات في حضن خوها . بكات . بكات . بكات مالغلب . مالقهره . مالوحده . مالفراغ . مالضياع . وهي عند خوها . حست اللي العالم وللى صغير . خوها ضمها ليه . مشى يدو على شعرها قاللها : 

شبيها أختي العزيزة تبكي . شكون بكالي أختي .

ومن بعد ، بعدها شوية ، ومسح دموعها بيدو . وهزلها راسها من دقنونتها ، خزرلها في عينيها . وعاود حطها بين أحضانو  تلفت لراجل أختو وقاللو : 

شفت آش عملت في أختي . راني مانحبش فيها . مسوني في عينيا وعزيزتي الغالية لا. المره هاذي جيت في شفاعة هاك الصغرونه . 

هكاكة ومرت خوها وأمها داخلين . قامت مرت خوها تزغرط . تلفتت . خزرت لخوها . قاللها : 

كل شيء وفا. الراجل جا . وعارف اللي هو غلط . طلب نقلتو . وتعين لهنا .

خزرلها راجلها قاللها : 

 عزيزتي أنا ما نقول حتى شيء  . لكن ربي يعلم قداش تعذبت . ما نجمتش نفارقك . وما نجمتش نصبر عليك .وفيت راني ماعادش فيا . قربلها . مد صندوق أنيق . 

قاللها خوها : 

عزيزتي ياغالية . أيا حل وفرجنا في الهدية .

قالتلها مرت خوها :

 يعطيك ياسميره . خليتنا عيله كاملة مشغولين على خاطرك . 

حلت الصندوق تلقا فيها بروش مرصعة بالديامونت . طبس عليها راجلها باسها من خدها . وشوشلها في وذنها : 

قداش ستاحشت هالخد . وهالريحة البنية  وقداش توحشت خزرتك وضحكتك .. ياااه شويه لا ضعت ياسميرة . شوية لاضعت . 

ضحكت .. ضحكت .. وتفكرت كابوسها اللي تعدى وقالت : 

أشكون قاللكم حبوني . 

دخلو العدول .

قال خوها : 

مهر عزيوتي قبل كل شيء . 

حضنت خوها وقالتلو عيشلي خويا . 

تلفت هو لراجلها وقاللو :

 هاذي ما تفرحش بيها كان بعد الصداق .