رسالة الغفران .. ( اللقاء مع خير الدين ) 2/1

بديت نحضر في الليسته متاعي .

قلت توه فما مرا أسمها عزيزة عثمانة . يقولوا اللي هيا كانت تعمل في برشة خير .. على عكس ما كان يظنوه ويعتقدوه ناس آخرين في بر تونس ، ناس آخرين من اولاد الشعب ، وفي الحقيقة ، العبد لله نمشي في هالتقييم هذا ، واسبابي في هذا بسيطة برشه ، كيف بساطة الناس التوانسة اللي يحبوا يكونوا توانسة ماهمش متسولين عند السلطة المنحرفه .. 

ماو من حقي باش نسأل زادة ، إذا كانت هالمرا هاذي فعلا ، فاعلة خير ، وهي فعلا اللي بنات المارستان اللي متسمي باسمها ، ووقفتو عالرعية ، سؤالي :

منين جابت الفلوس ، عندها رزق وسواني ، باهي ، لنفرض عندها ، منين جاها هالرزق تره ، و كيفاش جاها  ؟

بحيث إذا كانت هالمرا ، اللي هي أميرة زاده ، ومن مطبخ العايلة المالكة  وعندها هالثروة ، مؤكد ما تكون ناتجة كان كان غورة على حقوق التوانسة ، واغتصاب بالقوة ، والعنف والدم ، لاراضي واملاك اولاد تونس ، ومن بعد يجيوا يعطيوا مالشاه كراعها  ، قال شنوه عاملة حبس موقفتو عالمارستان ..

اه ، وقداش يسخفوني هاك الرهوط اللي مسجلين رواحهم صحافيين ، ومثقفين متاع السطوحات ، كي يبداو يجغجغوا ويوزعوا في " علمهم المغشوش والمدسوس " عالتوانسة  ، ويتمعشوا بهالمعلومات الوهمية ، الرخيصة والمزيفة  ، واللي ما عندهاش سند يوثق مصادر ممتلكات. هالمرا هاذي ، وفي حالة " للا " عزيزة عثمانه هاذي مثلا .

وقعدت نسأل في روحي  :

منين ليها الفلوس باش تعمل هذا ويتنسب ليها هالخير الكل ..

ويروجوا اللي هيا كانت مرا محسنة ، يعني هالشعب هذا كان عايش على " إحسان " مجموعة مالقراصنة الأتراك ، بركوا  ع البلاد واغتصبوا حقوق أهلها وولاو يحسنولهم ..

 هو ثمة واحد سارق ومغتصب وقاتل ينجم يعمل الخير ..

كبفاش تجي هاذي تره ؟

تسرق الشعب في حقوقو وممتلكاتو ، وتمشي ، تبنيلو مارستان باش يدعيلك بالخير ..

ايا قلت فك عليا من هالمرا  هاذي ، ما عنديش وقت حتى باش نشوفها وسألت المظيف ، قلتلو :

بالله كيفاش نعمل ؟ توه أنا نحب نستدعي برشة نسا وبرشة رجال.، لكن ما نعرفش أشكون منهم في جهنم  ، وشكون منهم في الجنة ، هالمعلومة منين ننجم ناخذها من فضلك ؟ 

تلفتلي وقاللي : 

يابنادم . ياخي آشبيك ! مازلت تتصور نفسك في الدنيا لخرى ؟ هنا راهو ماعندناش التشمشيم ، وهذاكا وين كان ، والا فين يعيش توه .

أنت تعمل الليسته ونحنا نجيبولك العباد ..

ومشا على روحو . وخلاني في حيرتي . كثر عليا التخمام والتفكير . السراق برشة ، والحفترية برشة ، وقتالت الأرواح برشة . والغشاشة برشة . والمنافقين برشة . قداش  نعدد .. وبشكون باش نبدا .. وغرقت في الحيرة . حرت وحار دليلي .. ما نفيق كان بواحد .. متعدي قدامي .. هازز راسو للسماوات السابعة ، وشلاغمو مبرومة ، وحاطط على راسو شاشية ماجيدي عليها نيشان مذهب ، وعلى صدرو نواشن ، لو كان تتحط على ظهر جمل يبرك بيهم ، وهو تقولش عليه خاض الحروبات متاع الدنيا الكل ، وفي التوارخ الكل ، وقعدت حاير في هالسيد ، كيفاش يدز في صدرو لهنا . قلت بيني بين روحي : 

أشنوه زادة يطلعش هالسيد حنبعل ، والا أميلكار  ، والآ ماسينيسا ، والا سيفاكس ، وألا يوغورطا ، والا كسيلة ، وألا واحد من جنرالات عقاب الزمان ، هاك اللي عملوا حروباتهم الكل في بيرواتهم ؟ البركة وقلة الحركة  وكثرت النواشن وهوما في البيروات المكيفة .. والكروش داززة .. ويقلك جنرال !؟ .. ماهي المسائل ، ولات معقدة ياسر  ، وانا منين نعرف هاللبسات هاذي لانا عصر ترجع ، بعد اللي بعدت اللي عندي مده وانا خارج عالدنيا .. 

عيطت للمظيف وسألتو : 

بربي ، تنجمش تقللي هالسيد اللي ماشي جاي قدامي نافخ ريشو تقولش عليه ما زال في الدنيا ، أشكونو ؟ 

قاللي : 

نصار أنت ما تعرفوش ؟ هذاكا الجنرال خير الدين .. خير الدين باشا ..

وعيطلو .. : 

أيجا يا خير الدين .. السيد طلع ما يعرفكش .. خليه يتعرف عليك .

تلفتلي سي خير الدين وخزرلي كي البوكشاش وقال : 

ماني نعرفهم ! جد أصلهم الكلب التوانسة ! نكارين عشرة  ! وما يعترفوش بالجميل ! .. ياخي هالزفت هذا موش واحد منهم ؟ هاك تشوف ، طلع حتى هو ما يعرفنيش ..

وبدا سي خير الدين يطوال ويقصار عليا .. : 

أنا اللي بنيتلكم المدرسة الصادقية !

أنا اللي عملتلكم المدرسة الحربية في باردو  !

 أنا اللي عملت الديموقراطية وكتبتلكم أقوم المسالك ،

أنا اللي عملتلكم الرائد التونسي .

أنا اللي عملتلكم المطبعة .

أنا اللي نظفت البلاد مالسراق والحرايمية .

أنا خير الدين

انا الجنرال خير الدين ، اللي فددتوني ، ومررتولي عيشتي ، وعيفتوني في روحي .

ماني  سيبتلكم البلاد ، وهجيت ، وخليتهالكم واسعة وعريضة . الباب العالي عيطلي . آحتاج لخدمتي . مولانا السلطان هزني للأستانة ، وكبر بيا  ، وعرف قيمتي وآستخمدمني ... يجي واحد من دشرة واقفة على حجرة ، شاددة روحها بالسيف ، فيها جامع ، وولي أسمو سيدي بوقديدة ، وكان ما نسيتش فيها أربعة وعشرين دار ، الواحد ما يطلعلها ، يشق الحومة ويطلع للبلد ويوصل لكاف دار قماش ، كان ما ريقو يشيح ، ونفسو يتقطع ..

أنا الجنرال خير الدين ، اللي عملت الخريطة متاع دشرتكم من عام 1864 .

دشرة فوق حجرة ، ما تلقى كان  الصخر والحجر ، مالشمال ، وأنت جاي من زغوان ، تدخلها من فم سلاقة ، و تتعدى عالمندرة ، وتطلع على حمادة صغية تسمي ها الرمل ، تلقى روحك في الحومة ، وتشق الزقاق ، وتطلع لين تلقى روحك في البلد ، ومالشرق ثنية بين السوداني ، على يسارك الجبانة ، واللي اللي مسمينو بوقديدة ، كي تو لهاك الحونتة ، تختار يا تمشي عالحومة ، ياتتلفت ياسار ، تلقى مسرب مايل ، يحزم كاف دار قماش ، من شيرة الشرق ، مسمينو ثنية المعزة ، هه بالشبر نعرفها ، ونعرفها علاش تطل ولاش تصلح ، هو نحنا تحسايب ما عناش خبرة في اللي يقولوا عليها توه عندكم  "ستراتيجيا "..

هه شيء غريب والله ، انا نعرف دشرتكم خير منكم ، يجي توه واحد منها ، ويسأل أشكون أنا .. باهي .. باهي .. نعاود نقللك أشكون أنا ..

أنا خير الدين باشا ..

 أنا الجنرال خير الدين ..

تعرفني القورة ، والمالط ، ولنكليز ، والطلاين ، والسبنيور والدزيرية ، والطرابلسية  ، والمراركة ، والسلطنة العثمانية ..

اي نعم والسلطنة العثمانية ويامندراك ، أنا اللي الباب العالي جابني باش نخدمو في الأستانة ،

وبدأ سي خير الدين كيف اللي شدوا السلطة الكل ، يجيب ويجلب ، ويهز وينفظ ،  وبدأ يخرنن من جديد ، وانا نخزرلو وباهت في هالراطسة ، كيفاش تسمى جنرال وحكم في برنا وكمل  :

أنا خير الدين اللي يسمعوا بيا في بر رب العالمين ،

كتبوا عليا الكتب ،

وعملوا لبحاث ،

وسماوني خير الدين التونسي ..

وسماوني خير الدين المصلح ..

وقعدتو تجريو وتجريو  ، باش تجيبوا رفاتي  لجبانتكم المزمرة هاذيكا ..

 تو أنت وليت ما تعرفنيش ؟؟

 باللازمة .. باللازمة .. لو كان في هاك الوقت ، بعثت الدشرة متاعكم  عشرة عساكر ، راني خليتها وجليتها  ، ورديتها جير وجرجير ..

 أنا الجنرال ...

المضيف شافو يتهز ويتحط قاللو : 

ياخير الدين .. ياخير الدين .. أشبيك نرفوزي .. الراجل ما يعرفكش .. ما عاشش معاك فرد عصر .. كيفاش تلوم عليه .. لا . هكا راهو ما نتفاهموش . شوية تواضع من فضلك ، لهنا

ما فما حد خير من حد .. ويلزمك تعتذر للراجل .. 

قعد سي خير الدين يتهز ويتحط ، ويتلفت لجنابو ، يقللك  : يتعداش بن ضياف ، والا مصطفى بن سماعين ، والا خزندار ، والا حد من جماعة البلاط ، يقوموا يضحكوا عليا ، قال شنوة  ، قال هيبتو طاحت في التراب ، اشبيك ، جنرال ، ووزير أكبر  ، يطلب السماح من واحد من رعية سيدنا ..

وشكون ..

واحد مالرعية المزمرة ، من دشرة مغروسة فوق حجرة .. تنقورة متاع جبل ، معزولة ، الواحد كي يخزرلها أول مرة.، يقول عجب ! ياخي العباد اللي فيها كيفاش عايشين ..

هاو من اش سي خير الدين باشا ، الجنرال ، تقلق وتحرج .. تلفت يمين تلفت يسار .. طمان اللي أحنا وحدنا قاللي : 

سامحني .. يا طفل . راهي عوارض الدنيا ساعة ساعة ترجعلي وتردني في هالحالة .

( فمة جزء آخر من اللقاء مع خير الدين باش نكملو من بعد .. ماني ما نحبش نطول عليكم )