اولاد القحبة والا اولاد الحاجة

باش نحكيلكم حكاية غريبة وقعت قدامي ، وبالكش راكم شفتوها  ، والا شفتو حاجة تشبهلها وقعت قدامكم !

تو انا نعرف اللي في الفايسبوك الناس  " مخلطة " لكن الله غالب ، شيء ينطق مالجناب ، باش تعرفوا كيفاش البلاد فسدت وخمجت ، وما عاد تلقى ما تفرز من رأس القرطلة  لقاعها ..

الواحد يقول الله غالب وكهو  ..

الحكاية وما فيها ...

ثمه مرا قحبت .. قحبت .. لين ولات كي قناة مجردة ، تعدي باطوات ، وبهايم وكرارط وكراهب ، وتنجم تقول كي داموس السيدة تعدي ترينوات !

من بعد نضالها الطويل والمرير والمستمر في دومان القحب والتبطرين ، ثمه شكون مالطحانة متاعها  ، زغرتلها في وذنها ودبر عليها قاللها  :

ماشاء الله عليك وعيني ما تضرك ، تو انت عملت في خلاها ما وألاها ، ولميت فلوس متلتلة ، وعملتلك خمسة والا سته طحانة ، وحبلت منهم ، وجبت لنثى والذكر ، وهانا نشوفو فيهم اولاد القحبة ، بكلهم فالحين ، وناجحين ، لكن ، قعدت على جبينهم هالوصمة ، اللي يحب ينسبهم يقول اولاد القحبة !!

وهذا في الحقيقة ما يليقش لا بيك لا بيهم ، والدنيا تبدلت ، كيما قاعدة ترى ، وهاك تشوف ، مللي جاء البدر ، وحط حوافرو وغرس ظوافرو في البر ، ولات اللي هاذي تتحجب ، وتحج  ، ويوليو يعيطولها ياحاجة !! .. عاد ، هوما ماهمش خير منك ، وماهمش أشرف منك ، ولهذا ننصحك باش تمشي تحج ..

وهاذاكا اللي صار .. القحبة سمعت الكلام .. بعدما هبطت الدمعة من عينيها حيار  ، قال شنوة ، قال دموع التوبة ، من حينك عملت حزب لطيف ، ومشات حجت وروحت .. تلق لقان كي  "الفرفوري " بعد غسيلو ، ولو أن بعض الناس ما تحبش الغسيل وما تحبش الفرفوري ، ومن هاك الحجة متاع التقوحيب ولاو الناس الكل يعيطولها ياحاجة .. بحيث دبارت هاك الطحان فلحت.. والمرا ولاو الناس يتهاداو بيها هكا هكا ويشهدوا بيها .. هاي الحاجة قالت.. هاي الحاجة مشات .. هاي الحاجة جات .. وتنسات امجادها القديمة في القحب والتبطرين  .. وولاو ذريتها ، بالك وسع ، بنت الحاجة جات ، بنت الحاجة مشات ، بنت الحاجة قالت ، بنت الحاجة فعلت ، بنت الحاجة تركت .. وهكاكا أولادها ..

علاش ما تقولش عشية سبت ، والجميعة قاعدين ، نساء ورجال في الصالون/د/تي ، وأولاد الحاجة/القحبة داخلين ، خزر واحد كان لبره عندو سنين ،  للسيد اللي بجنبو ، وما كانش عارف " المستجدات ! " قاللو  :

تيان ، تيان ، هاهم اولاد القحبة داخلين !

قام واحد في الطاولة اللي بحذاه قاللو  :

يزي عيب عليك ، هاذوكم اولاد الحاجة ويامندراك ! ..

اولاد الحاجة موش اولاد الحاجة !!..

اولاد القحبة موش اولاد القحبة !! ..

كلات بعضها وركحت فيها زكرة بريك !

وما نحكيلكمش ياجماعة ..

الحومة الكل لليوم شاعلة ، والناس اللي فيها بنساها برجالها ، بكبارها بصغارها ، كولني ناكلك  !

عاد بما اني فهمت الدرس ، وعارف اش باش يجرالي لوكان ناقف لهنا والا غادي ، كي سألني صاحبي عالحكاية ، والدنيا خايضة ، وعياط وزياط ، واذاعات ، وتلافز  ، وجرايد ، وهلمه وحضب تتلم وتتفرق  قلتلو  :

شوف ياصاحبي ، الشيء هذا عيب ، والا بالله قللي ، شنوه الفرق بين اولاد القحبة والا اولاد الحاجة ، المسألة الكل حسب رأيي البسيط ، اختلاف في وجهات النظر .. والا اش كان عليه لوكان يقولوا :

 اولاد اللي قحبت وحجت .. والا .. اولاد اللي حجت بعدما قحبت !!

--------------------------------------------

تنويه :

الحقيقة التدوينة هاذي باش تكون محل  " استنكار " من قبل بعض الصديقات والأصدقاء واعتذر لهن ولهم ..

لكن بقية اللحاسة والطبالة والرهازة والرقاصة في اليسار وفي الوسط وفي اليمين وفي سفهاء الدين وسماسرة الفضائل فهاذهم ما همش على بالي بالكل !

---------------------------------